Kujataa
Aalisariut nutaaq suliffisanik 60-inik pilersitsilersoq
Arctic Prime Fisheriesip Kujataani saarullinniutini ningittagarsuummik nutaaliaasuumik ilavai
Sinerissap avataani saarulleqarluarnera suliffissaqartitsinermut aalisakkerivinnillu Kujataani aalajaatsumik ingerlatsinissamut neriuuteqalersitsivoq.
Aalisakkanimmi tunisassiornermik ingerlatsivik, Arctic Prime Fisheries, Kujataani aalisakkerivinnik marlunnik ingerlatsisoq, maannalu ningittagarsuummik ‘Aja Aaju’-mik 34 meterisut takitigaluni 465 bruttonsiusumik peqareersoq, aalisariutaatiminik ilasivoq saarullinniummik nutaaliaasumik ningittagarsuummik.
- Ingerlatsiviup nutaamik aalisariuteqalernermigut Nanortalimmi aamma Qaqortumi aalisakkeriviit tunisassiassanik pilersorneqarnissaat nukittorsarpaa. Aalisariutip pigilerneratigut naatsorsuutigaarput suliffinnik nutaanik 60-nik malitseqartitsinissaa, kiisalu maanna sulisooreersut aalaakkaanerusumik sulilernissaannut qulakkeerinneqataassaaq. Neriuutigaarpullu naammattumik pisassaqartinneqarnitsigut suliffissat ukiumut 150-it atatiinnarsinnaassagigut, Arctic Prime Fisheriesimi pisortaaneq, Hentzar Petersen, oqaluttuarpoq.
Ungasinnerusumik pilersaarutinik ujartuisut
Hentzar Petersenip oqariartuuteqarnera naapertorlugu Kujataani aalisarnermik suliffissuaqarnerup ersarissumik siunissamullu ungasinnerusumut tikkuussisunik pilersaarusiortoqarnissaa pisiaqartilluinnarpaa.
- Ukiunut arlalikkaanut pisassiisoqartalernissaa pisariaqarpoq, taamaalilluni ingerlatsiviit aalisariutinut eqqortunut nutaaliaanerpaanik atortoqartunut kiisalu nunami atortussanut aningaasaliissuteqarnissaanut, aalaakkaasumik ingerlatsinissamut suliffissaqartitsinissamullu, isigaluni, Hentzar Petersen oqarpoq.
Arctic Prime Fisheries ningittagarsuutaa nutaaq 44 meterisut takissuseqarpoq 962 bruttotonsiullunilu.
Arctic Prime Fisheries Kujataani aalisakkerivinnik marlunnik, saarullinnik tunisassianik, soorlu Nanortalimmi aalisakkanik tarajortikkanik Qaqortumilu nerpinnik qerititanik, aallutaqarpoq.