Maniitsoq
Aalisakkerivinni tikisitanik sulisoqalernissaa Qeqqata Kommuniata taperserpaa
Royal Greenlandip Maniitsumi aalisakkerivissua sulisunik amigaateqarpoq
Maniitsumi Royal Greenlandip aalisakkerivissuanut sulisunik pissarsinissaq ajornaatsuinnaanngilaq.
Suliffissuaq taamaattumik kissaateqarpoq, Nunatsinni sumiiffinnit allanit, nunanit allanit sulisunik pissarsinissaq periarfissaalissasoq.
Tapersersoraa
Tamannalu kissaat borgmesterip Hermann Berthelsenip Qeqqata Kommuniata suliffissaqartitsiniarneq pillugu maajip 25-ani illoqarfimmi isuamasioqatigiititsinerani taperserpaa.
Atuaruk: Royal Greenlandimi tunisassiorneq nutaaq unammillernartumik eqqugaasoq
Oqallinneq pitsaasoq
- Nuannaarutigaara isumasioqatigiissitsineq iluatsilluarmat. Isummat isumassarsiallu qaffakaatinneqarput. Aamma nuannaarutigaara Maniitsumi suliffissuit pingaarnersaanni Royal Greenlandip aalisakkerivissuani sulisussaqarniarnikkut ajornartorsiutit qanoq iluarsiivigineqarsinnaanerat eqqartorluarneqarmat.
Atuaruk: Maniitsumi saarullinnik panertuliorneq aallarteqqinneqassaaq
- Aalisartut aamma Royal Greenlandip aalisakkerivissuata kissaatigaat sinerissamit nunanillu allanit Maniitsumut tikisitsisoqartalernissaa. Oqariartuutaat kommunalbestyrelsip tungaanit tusaavarput, borgmesteri tusagassiuutinut nalunaarummi erseqqissaavoq.
Isumasioqatigiinneq assingusumik Sisimiuni aggustip naanerani malitseqartinneqassaaq.