Monday, March 20, 2017 - 11:58

Aalisakkerinermut suliffeqarfissuaq 2 milliardinik kaaviaartitsisoq

Assi.: Kangamiut Holding
Kangamiut Holding ukiut pingasut ingerlanerini sinneqartoorutimi marloriaataat sinnerlugit 65 millioninngortippai. Finans taama allappoq.

70-ikkunni Kalaallit Nunaanni aamma Savalimmiuni tunisassiorfeeqqanit raajanik pisiniartarnermik aallartittoq nunani tamalaani suliffeqarfissuanngorluni milliardinik kaaviaartitaqalerpoq.

Kangamiut Holding A/S siorna 2 milliardit koruunit sinnerlugit kaaviaartitaqarpoq. Finans taama allappoq.

Raajat qalipallit pingaarutillit
Ingerlatseqatigiiffik Jyllandip avannaani Dronninglundimi qitiusumik allaffeqarfeqarpoq, Niels Vinther Rasmussenimit meeraanillu inersimasunit pingasunit pigineqarpoq. Taakku siorna sinneqartoorutit 65 millionit koruunit nuannaarutigaat.

Ingerlatseqatigiiffik Niels Vinther Rasmussenip 1975-imi piginneqatini Jørgen Ulme peqatigalugu aallartippaa.Tunisassiorfinnit minnerusunit pisilluni aallartinnerup kingorna raajat qalipaqanngitsut ingerlatseqatigiiffiup ilisarnaatigilerpai, taamani kalaallit kilisaataat amerlatsimmata.

Rusland
Ingerlatseqatigiiffik ullumikkut ilaatigut aamma qalerallit Nunatsinneersut avammut niuerutigisarpai, assagiarsussuit Barentshavetimeersut kiisalu saarulliit kullerillu Murmanskimeersut.

Kangamiut Holding Kalaallit Nunaanni, Danmarkimi, Tuluit Nunaanni, Frankrigimi, Islandimi, Norgemi aamma Ruslandimi ingerlatseqatigiiffinnik piginneqataaffeqarpoq.

Suliffeqarfissuaq Kangamiut 2017-imi 100 millionit koruuninik amerlanerusunik kaaviiaartitsiniarluni naatsorsuuteqarpoq, 40 millionit koruuninillu sinneqartoorniarluni.

Niels Vinther Rasmussen ingerlatseqatigiiffiup ingerlanneqarnerani peqataajunnaareerpoq, kisianni siulersuisuni suli ilaasortaavoq.

Seneste nyheder / Nutaarsiassat kingulliit