Aalisarneq
Aalisakkat kisimik isiginiarneqarnissaat navianaateqartoq
Avaleraasartuut pisarineqartartut nikerarnerat aningaasarsiornerup sunnertianeranut assersuutissaalluarpoq
N unatta karsiata aalisarnermit akitsuutinit isertittagai ukiuni makkunani amerliartupiloorput – 2005-imi 49.000 koruunioriarlutik 2017-imi 285 millionit koruuniussagamik.
Kinguppannut akitsuut isumalluutinit ernianik taaneqartartunit kisimi ukiuni amerlanerpaani isertitsissutaasaraluarpoq, 2013-imili qalerallit avataasiorluni aalisarnermi pisarineqartartut aamma akitsuuserneqarput, 2014-imi avaleraasartuut akitsuuserneqarlutik aamma qalerallit sinerissamut qanittumi pisarineqartartut 2016-imi akitsuusersorneqalerlutik.
Niuernikkut akit nikerarneri
Aalisakkat pisarineqartartut tamarmik aalisakkanit isumalluutinit akitsuusersuisoqalernissaa naalakkersuinikkut anguniagaavoq, taakku inuiaqatigiinnit pigineqarnerat tunngavilersuutigineqarluni.
Tamatuma peqatigisaanik Nunatta karsiata isertittagaasa amerleriarnerisa kinguneranik akitsuutit pisortanit isertinneqartartut siornatigornit pingaaruteqarnerulerput.
Taamaattorli aalisakkat akitsuutaat kisiisa isertitsiffiginiassallugit navianaateqarpoq.
– Aalisakkat qaleruallillu niuernikkut akiisa nikerarnerinut sunnertiasuararsuuvugut, Sulisitsisuni pisortaq Brian Buus Pedersen Sermitsiamut oqarpoq.
Naalakkersuisut aningaasanut inatsisissatut siunnersuutitut saqqummiussaanni ukiuni 2017-20-mut atuuttussani taamaallaat 100.000 koruunit sinneqartoorutaassasut saqqummiunneqarpoq.
Tulluusimaarutissaanngitsut
– Piffissaq ungasinnerusoq isigalugu aalisagaativut qaleruallillu piumaneqarnerulissapput, pisimasulli qiviarutsigik akit nikerartorujussuusarput. Aningaasanut inatsisissatut siunnersuummi inerniliunneqartoq isigigaanni, aningaasarsiornerput akit taama nikerarnerinut naammattumik qajannaassuseqanngilaq.
– Qajannaatsuunissaq tamanna taamaallaat iluarsaaqqinnerit aqqutigalugit angusinnaavarput, tamannami inuiaqatigiinni ineriartornermik pilersitsisussaammat, Brian Buus Pedersen oqarpoq, taassuma Naalakkersuisut iluarsaaqqinnermut suliniutaat maannamut tulluusimaarutissaannginnerarpai.
Allaaserisaq tamaat Sermitsiami ullumi saqqummertumi atuaruk. Aviisi uani aamma pisiarisinnaavat: