Nuuk
Aalisakkat 400 tonsit Nuup avataani imaanut eqqarneqassapput
Canadamiut kilisaataata F/V Saputi-p ilulissamut aporluni immannerata kingorna raajat, qalerallit poortuutissallu eqqarneqassapput
Kommuneqarfik Sermersooq eqqagassanik allaanerusunik isumagisassaqalerpoq.
Canadamiut kilisaataata F/V Saputip, sapaatiummat ilulissamut aporluni ajoqusertup - maannalu Nuummiittup - aalisakkat usii 400 tonsit eqqarneqassapput.
Asiulersimapput
Raajat qalerallillu 400 tonsit kiisalu imaq immannera 1.600 kubikmeteri suli lastianiittoq, asiulersimapput. Tamatuma saniatigut poortuutissat, ilaatigut plastikkit, aserorterneqassapput.
Suliassaq nalinginnaanngitsoq
– Suliassaq nalinginnaasuunanilu qaqutigoortuuvoq. Taamaattumik Namminersorlutik Oqartussat kommuni, ingerlatsiviit Nuup Amutsivia aamma Masik, suleqatigalugit periusissiorsimapput qanoq isilluni eqqagassat lastimiittut immikkoortiterneqassanersut. Poortuutissat Nuummi Ikuallaasarfimmi ikuallanneqassapput, immanneralu aalisakkallu, asiulereersimasut, imaani sumiiffimmut, Namminersorlutik Oqartussat innersuussutaannut, eqqarneqassapput, taamatut Kommuneqarfik Sermersuup nittartagaanut paasissutissiivoq Ingerlatsinermut Avatangiisinullu sammisaqarfimmi pisortaq Frank Rasmussen.
Nakkutilliissaaq
Kommunip avatangiisinut immikkoortoqarfiata periusissiat malinneqarnissaat nakkutigissavaa.
– Naatsorsuutigineqarpoq F/V Saputip lastiani eqqagassat piaarnerpaamik immikkoortiterneqalissasut, pissutigalugu aalisakkat asiulereersimammata, taamatuttaarlu suliaq ajornakusoortinneqarluni umiarsuup uinganeranik lastillu iserfigiuminaanneranik, taanna oqarpoq.