akitsuutit
Aalisakkanut akitsuutit nutaat akerlilerneqarput
Naalakkersuisut siunnersuutaat Inatsisartuni avataanilu isornartorsiorneqarput
Qalerallit kiisalu aalisakkat ikerinnarmiut arlallit akitsuutaasa qaffanneqarnissaannik Naalakkersuisut siunnersuutaat partiit illua'tungiliuttut annersaata sulisitsisullu akerlilerpaat.
Akitsuutinut siunnersuutit tallimanngormat Inatsisartuni siullermeerneqassaaq.
Akerlerinngilaat
– Aalisakkat ataatsimullu pisuussutitta akitsuuserneqartarnerat Inuit Ataqatigiinnit nalinginnaasumik akerlerinngilarput. Sakkortuumilli kajumissaarutigissavarput akitsuutit eqqunneqartassasut peqqissaartumik piareersarneq tunngavigalugu eqqarsaatigilluakkamik, partiip oqaaseqartartua Aqqaluaq B. Egede tusagassiorfinnut nalunaarutikkut tikkuaavoq.
Sulineq tukattoq
Taassuma akitsuutinut siusinnerusukkut aalajangiisarnerit ´tukattutut´ taavai, ilaatigut kingunerisarsimallugu akitsuutitigut isertitassatut naatsorsuutigisat landskarsimut isertinneqartaratik.
– Assersutigalugu 2015-imi naatsorsorneqarsimavoq Tunumi avaleraasartoorniarnermit 81 millioner koruunit isertinneqassasut. Taakkunannga 28,7 millioner koruuniinnat isertinneqarput. Tamatuma saniatigut suleriaaseq apeqquserparput, tassa Naalakkersuisut inuussutissarsiortunit peqataaffigineqartumik suleqatigiissitalioriarlutik gruppip suliani naammassinngikkaaluunniit akitsuutinik nutaanik eqqussisarnerat, Aqqaluaq B. Egede erseqqissaavoq.
Immikkoortillugit
Aamma Sulisitsisut Peqatigiiffiata (GE) akitsuutit nutaat isornartorsiorpai.
– Akitsuutit nutaat eqqunniarneqarput, siusinnerusutut aalisarnermut politikkimit immikkoortillugit avissaartilluinnarlugillu, peqatigiiffiup pisortaa Brian Buus Pedersen naliliivoq.
Taanna isumaqarpoq inatsisissatut siunnersuut piffissamut sivisuumut nutaanik aalisarnermik ineriartortitsinermut akornutaassasoq, tamanna Kalaallit Nunaanni inuiaqatigiit aningaasarsiornerannut ukiorpassuarni iluaqutaasinnaagaluarmat, piffissamut sivikitsumut landskarsip isertitaqarnissaata eqqarsaatigineqarneratigut pisariaqartumik aningaasaliisussat qimaatinneqassanngippata.
Akitsuutit naammaginartut
GE-lli akuersaarpaa inatsisissatut siunnersuutikkut pisuussutit naammaginartumik akitsuuserniarneqartut.
– Akitsuutilli nutaat, aalisarnermut politikkip sinnerata anguniagaanut ataqatigiinngitsumik eqqunneqarpata, inuiaqatigiit aningaasarsiornerannut sapinngisamik annertunerpaamik pisassiaqarnissamut periarfissat annikillineqassapput, Brian Buus Pedersen oqarpoq.
Sulisitsisut Peqatigiiffiata akitsuutinut nutaanut isornartorsiuinera Sermitsiami normu 15-imi annertunerusumik atuaruk. Aviisi ataani linki atorlugu pisiarisinnaavat