unikkallarnermi atuagassat
Aalisakkanik tunisassiorfissuup sulisuni tamaasa aviisinik pisalertippai
Royal Greenlandip CSR-imut iliuuseqarnini nukittorsarlugu suliffeqarfimi sulisut tamaasa Sermitsiamik aamma AG-mik pisartagaqalertippai
- Assorsuaq nuannaarutigalugu nalunaarutigaara, Royal Greenlandimi sulisut tamaavimmik Danmarkimiittut Nunatsinniittullu, nunami immamilu suliffeqartut, maanna AG aamma Sermitsiaq pisartagarilermassuk, Royal Greenlandimi sulisoqarnermut pisortaq, Søren Olsen Damgaard, oqaluttuarpoq.
Isumaqatigiissut
Royal Greenlandip aamma Mediehuset Sermitsiaq.AG-p suleqatigiinnerisigut taamatut pilersitsisoqarpoq.
- Suliffeqarfiup tungaanit taama iliorneq alloriarnerujussuartut isigaarput. Maannamit aviisinut malinnaasinnaanngorpugut, inuiaqatigiinnilu pisunik itinerusumik paasisaqartalerluta, Søren Olsen Damgaard nassuiaavoq, taassumalu kissaatigaa suliffeqarfiup suliusuit inuiaqatigiit ineriartornerannut aamma demokratiimik tunngavilimmik oqallittoqarneranut malinnaasinnaanissaat.
Isumaqatigiissut annertooq
Tusagassiorfimmit isumaqatigiissut nuannaarutigineqarpoq.
- Suliffeqarfimmi ataatsimi sulisut ataatsimut Sermitsiamik aamma AG-mik atuaasinnaasut annersaasa ilagaat. Kisiannili kisimiinngilaq. Suliffeqarfiit arlallit, angisuut aamma mikisut sulisutik tamarmik aviisinut taakkuninnga marlunnik pisartagaqarnerat suilffeqarfimmut aamma CSR-imut iluaqutaasinnaanera paasilernikuuaat, tusagassiorfimmi Sermitsiaq.AG-mi pisortaq, Poul Krarup, oqarpoq nangillunilu:
- Suliffeqarfinni sulisut inuiaqatigiit ineriartornerannut aamma demokratiip ingerlariaasiannut malinnaasinnaanerat, sulisunut ataasiakkaanuinnaq pingaaruteqanngilaq. Aammali suliamut tunngasumik ineriartornermut aamma inuiaqatigiinnut ataatsimut pingaaruteqarpoq, Poul Krarup, oqarpoq.
Qarasaasiakkut
Isumaqatigiissuteqarnikkut Royal Greenlandip aviisit naqitat aamma elektroniskit ataatsimoortillugit iluaqutigigaat oqartoqarsinnaavoq. Tassami ilaatigut, sulisut tamarmik e-aviisi ingerlaannaq qarasaasiakkut pisassavaat, naak Nunatsinnit ungasissumi immami nunamiluunniit suliffeqaraluarlutik.
- Suliffeqarfiit allat sulisumi aviisit inuiqatigiit ineriartornerannut malinnaatitsinerannut iluaqutissartai takusinnaassagaat neriuppunga, soorlu aamma kissaatigigaluariga Namminersorlutik Oqartussat kalaallit ilinniartut tamaasa periarfissittariaqaraluaraat, ingammik nunani allaniittut. Malinnaasinnaanermigut nunaminnut atassuteqarnerat nukittorneqassammat, Poul Krarup oqarpoq.