Kangaatsiaq
Aalisakkanik suliffissuaq tunisinermut ammaqqissaaq
Royal Greenlandip Kangaatsiami aalisakkanik suliffissua sapaatip akunnerani tullermi pingasunngorpat pisanik tunisiffigineqaqqissinnaalissaaq. Suliffissuaq nutarterneqarluni uninngasimavoq
Kangaatsiami aalisakkanik suliffissuaq, decembarip 10-anniilli tunisinissamut matoqqasimasoq, sapaatip akunnerani tullermi pingasunngorpat ammaqqissaaq. Taamatut paasissutissiivoq royalgreenland.gl.
– Suliffissuup naqqi iigaalu qerititsivialu nutartertariaqalersimasut nutarterneqarsimapput, taamaattumillu suliffissuaq decembarip 10-anniilli tunitsivigineqarsinnaasimanngilaq, Kangaatsiami Royal Greenlandip suliffissuani pisortaq Abia Thorteinsen oqarpoq.
Periarfissat allat
Royal Greenland naapertorlugu illoqarfimmi aalisartut pisatik nunaqarfinni qanittumiittuni Attumi, Niaqornaarsummi Ikerasaarsummilu tunisarsinnaasimavaat.
– Ukiup taamaasinera pissutigalugu maani aalisartoqarpallaanngilaq. Aalisartut amerlanersaat maanna qaqortanik qernertanillu qilalugarniarput. Taamaattumik illoqarfimmi aalisartut piffissami kingullermi Kangaatsiami tunisisoqarsinnaasimannginnera malugivallaarsimanngilaat. Aalisagarniartut pisatik nunaqarfinni eqqatsinniittuni tunisinnaasarsimavaat, Abia Thorsteinsen ingerlatsiviup nittartagaanut oqarpoq.
Sulisui tallimat qulillu akornanniissimapput
Royal Greenlandip Kangaatsiami aalisakkanik suliffissua oktobarimi saarullinnik tisaanik tunisassiorunnaarpoq, illoqarfimmi missaaleqineq pissutigalugu.
Taamanikkut sulisut 20-t angerlartinneqarput, sinnerilu aalisakkanik suliffissuarmut tunisanik qerititsillutik sulisinneqarput. Sulisartut taakku suliffissuarmi suliassaqaqqilissapput.
Suli imeq amigaataavoq
– Sapaatip akunnerani tullermi tunisineq qerititsinerlu aallarteqqinneqarpata sulisartut tallimaniit qulinut amerlassusillit sulisoreqqissavagut. Tunisalli amerlassusaat malillugu sulisoqartaraatta eqquissumik oqaatigisinnaanngilara qanoq amerlatigisut sulisorissanerivut. Tamatumunnga sila apeqqutaavoq, Abia Thorsteinsen oqarpoq.
Illoqarfimmi imissaaleqinermik ajornartorsiut suli aaqqinneqarsimanngimmat Abia Thorsteisenip naatsorsuutigaa saarullinnik tisaanik tunisassiorneq aatsaat upernalerpat nanginneqarsinnaassasoq.