aktianik paarlaanneq

Aalisakkanik nioqqutissiisarnermi unammilleqatigiittoqarnerulissaaq

Upernavik Seafoodimi Polar Raajanilu Royal Greenland Polar Seafoodilu suleqatigiikkunnaassapput. Kiffaanngissuseqarnissaq suliffeqarfinnit kissaatigineqarpoq

Royal Greenlandimi pisortaaneq, Mikael Thinghuus

Royal Greenland Polar Seafoodilu Upernavik Seafoodimi Polar Raajamilu suleqatigiikkunnaarlutik isumaqatigiissutigalugu tusagassiutinut nalunaarutigaat.

- Suliffeqarfinnik angisuunik Upernavik Seafooditut aamma Polar Raajatut ittunik piginneqatigiinneq siunissaq ungasinnerusoq eqqarsaatigalugu tulluartuusorineqanngilaq. Taamaammat ingerlatseqatigiiffiit suliffeqarfimmik ataasiinnarmik piginnittoqarnissaat qulakkeerumallugu Royal Greenland aamma Polar Seafood aktianik piginneqatiginnissutiminnik paarlaannissaminnut isumaqatigiipput, suliffeqarfiit tusagassiutinut nalunaaruteqarput.

Royal Greenland Polar Seafoodilu immikkut tamarmik Upernavik Seafoodimi 50 procentinik maannamut piginneqatiginnissuteqarput. Aktiaatiminnik paarlaatereernerisa kingorna Royal Greenland Upernavik Seafoodimik tamakkiisumik piginnittunngussaaq.

Suliffeqarfissuaq Polar Seafood Polar Raajami 57 procentinik maannamut piginneqatiginnissuteqarpoq Royal Greenlandilu 43 procentinik piginneqatiginnissuteqarluni. Aktiaatiminnik paarlaatereernerisa kingorna Polar Seafood Polar Raajami tamakkiisumik piginnitunngussaaq.

Unammilleqatigiinneq
Aktianik paarlaanneq ingerlatseqatigiiffinni pineqartuni ulluinnarni aqutsinermut sunniuteqarnavianngitsoq Royal Greenlandimi pisortaanerup Mikael Thinghuusip nalunaarutigaa.

Flemming Andersenip Upernavik Seafoodimi pisortatut atorfini ingerlatiinnassavaa, Henrik Eriksenillu Polar Raajami pisortaanini aamma ingerlatiinnassallugu.

- Aktianik paarlaanneq Polar Seafoodip Royal Greenlandillu immikkut aallussaasa tungaasigut aammalu nunarsuarmi niuernermik pitsanngorsaanissami ukkassinerulernissaat matumani taamaallaat aallaavigineqanngillat. Suliffeqarfissuit marluk pineqartut siunissami tunisassiarineqartussat tungaasigut Kalaallit Nunaanni ammasumik unammilleqatigiinneq tunngavigalugu ingerlatsisussanngorput. Tamatumunngalu atatillugu kiffaanngissuseqarnissaq, niuernikkut akisussaassuseqarluinnarnissaq eqaatsumillu aqutseriaaseqarnissaq pisariaqarpoq. Royal Greenland Polar Seafoodilu nunarsuarmi aalisakkanik niuerfinni Kalaallit Nunaata imartaaneersunik tunisassianik pitsassuarnik niueruteqartarneq eqqarsaatigalugu nittarsaassisarnerup saqqummiussisarnerullu tungaasigut suleqatigiiginnassapput taamatuttaaq Kalaallit Nunaanni aalisarnikkut nungusaataangitsumik aqutsinerup patajaallisarneqarnissaanik ingerlatseqatigiiginnassapput.

Powered by Labrador CMS