Aalisagaq tunisassiaq nersornaatisinikoq nuanit allanit soqutigineqartoq

Royal Greenlandip saarullinnik tisaanik tunisassiaa Nutaaq Cod, februarip qaammataani Tysklandimi aalisakkanik tunisassiortartut tunisassiani qerisuni pitsaanerpaatut “Seafood Star Award”-imik taaguutilinmmik nersornaaserneqartoq Tuluit Nunaannit soqutigineqarluarpoq.

Suliffeqarfik nittartakkamini taama allaaserinnippoq.

- Tuniniaanermut immikkoortortarput Manchesterimiittoq Tuluit Nunaanni neriniartarfiutilissuarmut saarullinnik tunisassianik Nutaaq Codinik annertuunik tunisaqaqqammerpoq, Royal Greenlandimi tunisassianik immikkoortukkaalerinermi ingerlatsisoq, Niels Wann Jensen RG.gl.-mut taama oqarpoq.

Royal Greenlandip Tysklandimi Bremenimi immikkoortortaqarfia Machesterimi Royal Greenlandip immikkoortortaani pitsaassusilerisoq aamma tuniaasut marluk, Svendstrupimilu niuerfissanik inerisaasoq aamma tunisassianik immikkoortukkaalerinermi ingerlatsisoq Niels Wann ilagalugit Sisimiunut, Nuummut Maniitsumullu tunisassiorneq immikullu Nutaaq Codimik tunisassiorneq pillugu paasisassarsiorlutik tikeraarput.

Atuaruk: Royal Greenland nunani tamalaani nersornaaserneqartoq

- Tamatta assigiinngitsunik aalluussaqarluta paasisassrsiorluta angalavugut, taammaattorli Nutaaq Codip tunisassiarineqarnera malinnaavigisallugu tamatsinnut pingaruteqarpoq, paasisariaqaratsigumi tunisassiaq taanna immikkooruteqarluinnartuusoq. Tunisassiap tunisassiarineqarnera nammineq isitsinnik takullugu tunisassiarineqartarneralu pillugu tuniniaavigisatsinnut oqaluttuarisinnaalernera tamatsinnut iluaqutaasussaavoq, Royal Greenlandimi niuerfissanik inerisaasoq Lene Ladegaard oqarpoq.

Tysklandimiu tuniniaasartoq Marc Wobbe, Nunatsinnut tikeraarnini assut nuannareqaa.

- Kalaallit Nunaat tikillugu misigisaavoq nuannersoq. Tuniniaasutut sulininni pisisartut apeqqutigisartagaat siulleq tassaasarpoq Kalaallit Nunaaniissimanersunga aamma tunisassap tuniniakkama tunisassiarineqarnerani takunikuuneriga, taamaattumik maanna Kalaallit Nunaannut tikillunga tunisassiat tunisassiarineqartut takullugit pissusissamisoorpoq, ingammik tunisassiaq immikkuullarissoq Nutaaq Cod Maniitsumi tunisassiarineqartoq takugakku tuniniaasutut uppernassusera annertunerulerpoq, Marc Wobbe oqarpoq.