Friday, January 12, 2018 - 12:07

Aalibap Kujataani nunarsuarmi eriagisassatut ilanngunneqarsimasoq ingerlatissavaa

Alibak Hard, 46-nik ukiulik Unesco Site Manageritut atorfinitsinneqarpoq
Assi.: Kommune Kujalleq
Nunarsuarmi eriagisassatut ilanngunneqarsimasut naleqartitallu kimit illersorneqarlutillu ingerlanneqassanersut, Kommune Kujalliup nassaaraa.

Ulloq 9. Juli 2017 Kujataani kommunimut ulloq pingaaruteqarluinnartuusimavoq. Taamanimi kommuni Unesco-p nunarsuarmi eriagisassatut allattorsimaffianut ilanngunneqarpoq.

Tassunga atatillugu oqartussaaffimmut nutaamut kina akisussaasuulluni takornarissanik amerlanerusunik tikisitsisalissanersoq, nassaarineqarpoq. Unesco Site Manageritut atorfinitsinneqartoq tassaavoq Alibak Hard, 46-nik ukiulik.

- Taamatuttaaq Alibak tassaassaaq kulturikkut kingornussat pillugit paasissutissiisarnermik suliaqarnermi aqutsisuusussaq, taamaalilluni Alibak tusagassiorfinnut pisortatigoortumik attaveqaataassaaq. Tamatuma saniatigut aamma innuttaasut suliniummi akuutinneqarnissaannik sulissutiginninnermi aqutsisuussaaq, nunaminertallu atorneqartarnerini saqitsaassutaanngitsumik ingerlatsisoqarnissaa isumannaarniagassaraa, meeqqat atuartut kingornussat pillugit ilisimasaqarluarnissaannik sulissutiginnissaaq aammalu pisortatigoortumik tikeraartoqartillugu nunaminertat takutissorneqartarnerini Alibak ataqatigiissaarillunilu siuttuusassaaq, kommuni tusagassiuutinut nalunaarummi paasissutissiivoq.

Piffissami kingusinnerusukkut nittartakkamik namminersortumik pilersitsisoqassamaarpoq, taamaatuttaaq oqartussaaffik nutaaq kommunip ingerlatsiveqarfiini aaqqissuussaanermut ilanngunneqassaaq.

Læs også

Seneste nyheder / Nutaarsiassat kingulliit