Aalborg
Aalborgimi politiit isornartorsiuisoqareersoq: Kukkussuteqarnata sulivugut
Wilhelm Amossenip toquneranut ilaqutaasunut arriippallaamik paasissutissiisoqarsimasoq Aalborgimi politiinit oqaatigineqarpoq. Kisianni kukkusimanatik oqaatigaat
(Allaaserisaq nutarterneqarpoq, tassani qulequtaq aamma qulequtaararlu allanngortinneqarlutik. Allanngortinneqarpoq Nordjyllands Politiit oqaaserisaat TV2 Nord-imi takuneqarsinnaalereersoq)
Aalborgimi pisoq alianartoq Sermitsiaq.AG-mit ataasinngormat marlunngormallu allaaserineqartoq, danskit tusagassiorfiinit aamma allaaserineqarpoq.
- Kalaallit Illuutaannut saaffiginnissimasinnaagaluarpugut.
- Kalaallit danskillu immikkoortillugit sullissinngilagut.
Nordjyllands Politini pisortap tullia Henrik Skals TV2 Nord-imut oqarpoq. Nittartakkami qulequtaritinneqarpoq 'Kalaallit politiinit sumiginnarneqarput'.
Apeqqummut kukkusumik nassuiaasoqarsimasoq politiit pisortaasa tullia oqarpoq:
- Kukkusoqarsimaneranik oqarsinnaanngilanga. Suleriaatsit misissorneqassapput, tassani isumaqatigiissutaasut misissorneqassapput, suleriaatsimilu qanoq suleriuseqartoqartarnersoq misissussallugu.
Wilhelm Amossenip Aalborgimi toqqukkut qimagutereernerani Nanortalimmi ilaqutaasut ullut 14-t qaangiunneranni aatsaat ilisimatinneqartut Sermitsiaq.AG-mi marlunngormat allaaserineqarpoq. Wilhelm Amossenip ikinngutaasa ilaat nammineerluni politeeqarfimmut paasiniaajartorpoq marsip pingajuani, tassani ilisimatinneqarpoq Wilhelm Amossen februaarip 17-ani toqukkut qimagussimasoq.
Aalborgimi Kalaallit Illuutaanni pisortaasup suliaq Folketingimut ilaasortatut Siumumeersumut Doris Jakobsenitulli tupaallaatigaa.
- Piffissaq taama sivisutigisoq ingerlareersoq aatsaat pisoq saaffiginnissutigineqarsimanera akuersaarneqarsinnaanngilaq. Kalaallit Nunaanni ilaqutaasut attaveqarfigisinnaanngikkunikkit politiit Kalaallit Illuutaannut sianersimasinnaagaluarput. Nalunngilaatigut aamma suleqatigiilluartarpugut, pisortaq Søren Stach Nielsen TV2 Nord-imut oqarpoq.
Wilhelm Amossen 64-nik ukioqarluni toqukkut qimaguppoq.