pilluarit
Aajuna Sisimiuni arnatsialak
Atisaarniarfik Anuni Sisimiuniittoq arnatsialaamik toqqaasitsivoq
57-nik ukiulik Frederikke Platou Sisimiuni arnatsialattut toqqarneqarpoq. Taanna uiminut aalisartut piniartutullu inuussutissarsiortumut tapersersuilluartuuvoq. Aamma kalaallisut qallunaatullu oqaluttunut unnukkut atuartitsinermi ammerinermik Sisimiuni atuartitsisarpoq.
Atisaarniarfik Anuni Sisimiuniittoq innuttaasunut kajumissaarisimavoq arnatsialattut piukkussaminnik innersuusseqqusilluni. Arnat 15-it innersuunneqarput taakkulu Anunimi sulisunit Ikiuna K. Olsenimit, Aviaq Høeghimit aamma Kristine G. Samuelsenimit nalilersorneqarput.
Arnat A-rujussuarmik allallugu
Toqqarneqartoq tassaavoq Frederikke Platou ukiorpassuarni uimi aalisartutut piniartutullu inuussutissarsiornerani tapersersuilluartoq. Nammineq aamma aalisariaqataallunilu piniariaqataasarsimavoq allaat qilaluganiarnermi aquttuusimallunissaaq.
Qatanngutigiinni angajullersaagami tulaaviujuartuuvoq tapersersuisuullunilu.
- Arnaavoq A-rujussuarmik aallaqqaasikkamik anaanaavoq meeqqaminik ernuttaminut asannittoq, inuunermik paarsilluaqqusisoq, inuiaqatigiinni pisunut malinnaasoq, namminersortoq, isummaminik tusartitsisartoq, ikiortissarsiortuunngitsoq, ilaquttaminik pingaartitsisoq, kalaaliussusermik tanngassimaarutilik illersuisorlu, Ikiuna K. Olsen Anuni Sisimiunit Frederik Platoup Sisimiuni arnatsialattut toqqagaaneranut tunngavilersuummi allappoq.
Toqqagaasup pissarsiaraa Anunimi pisissutissaq 2.000 koruuninik aningaasartalik aammalu Centrum Kioskimit naasunik tunineqarluni.