Aajuna Nunatsinni qimmerinnerpaaq

Avannaata Qimussersuani sukkaniuteqataasuni Ole Svendsen qimmerinnersaavoq.

Sukkaniunnersuarmi tassani naliliisartut taama naliliipput Ilulissani unammisoqarnerani qimmit sukkassusaat kisimi nalilersorneqanngimmat. Aammali qimmit paarilluagaarpalunnerat ilanngullugu maluginiarneqarpoq. Qimmerinnerpaatullu Ole Svendsen Ilulissaneersoq toqqarneqarpoq arfininngornermi unnukkut Ilulissat timersortarfianni naggataarnersiornermi nalunaarutigineqartumik.

Takuuk: Assit: Qimussimik sukkaniuteqataasut naggataarnersiortut

Silaannaap allanngornera
Ville Siegstadip aningaasaateqarfianit aamma kajumissaasiisoqarpoq. Aalisartoq Hans Petersen Ilulissaneersoq ukiorpassuarni aalisartuunermini qimussimik atuiuarsimanini pillugu kajumissaaseqarneqarpoq diplomip saniatigut 1.000 koruuninik aningaasartalimmik checkinnatsinneqarluni.

Ferdinand Olsen Akunnaameersoq aamma Ville Siegstadip aningaasaateqarfianit kajumissaaserneqarpoq. Taannaavoq maanna Akunnaami sukkaniuttartutuaalersoq. Nunaqarfik taanna Aasiaat avannannguaniittoq immamit ungalusaavoq silaannaallu allanngornera qimusserniarnermut killiliingaatsiarsimavoq, allaat amerlasuut qimmeerutiinnarnerannik kinguneqartumik-

Upernaviup eqqaani Nuussuarmiut aamma naggataarnersiornermi immikkut eqqaaneqarput.

- Nuussuaq nunaqarfeerannguugami aningaasanik katersuiniarnissamut killilerujussuarmik periarfissaqarpoq. Taakku peqataatitaata angalanerinnarmut aningaasat 65.000 koruunit atorpaat. Isumaqarpunga nersualaagassaasoq taama periarfissakitsigisumi aningaasat taama amerlatigisut katersorsinnaasimammatigit, Kalaallit Nunaanni Qimussertartut Kattuffianni siulittaasoq Mikkel Jeremiassen Sermitsiaq.AG-mut oqarpoq.

Sukkaniunnermi peqataasut nukarlersaat 15-nik ukiulik Hans Otto Jørgensen Ilulissaneersoq aamma KNQK-mit diplominnatsinneqarpoq taamatuttaarlu peqataasut angajullersaat 68-nik ukiulik Ville Siegstad

Avannaata Qimussersua aappaagu Qeqertarsuarmi pissaaq.

Avannaata Qimussersua pillugu allaaserisat uani atuakkit