Ilinniarnertuunngortut
Aajuna nasartaartut siullersaat
Ane Mette Andersen Sisimiuni GUX-imi ukiormanna ilinniarnertuunngortuni siullersaalluni nasartaarpoq. Sisimiuni ilinniarnertuunngortut aatsaat taama ukiormanna amerlatigissapput siornamut sanilliullutik marloriaatinngussagamik
Sisimiuni ilinniarnertuunngorniarfimmi tallimanngornermi erfalasoq amuneqarpoq tassanilu ukiormanna ilinniartuunngortut siullersaat Ane Mette Andersen erfalasulertuuvoq. Taanna ukiormanna soraarummeertut tamarmik naammassippata Sisimiuni ilinniarnertuunngortussat 80-usussat ilagaat.
Sisimiuni ilinniarnertuunngorniarfimmi naammassisartut amerliartupiloorput. Taamaattoq aallartinneq imaannaasimanngilaq.
- GU-mi ilinniartut imaannaanngitsorsiorsimaqaat aallaqqaamut GU-mik ingerlatsinermut ilisimasavut killeqarmata. Tassami fagit timersorneq, nipilersorneq, psykologi, upperisarsiorneq oqaluttuarisaaneq allallu ileqqutoqaasut eqqunniarnerat KTI-mut imaannaasimanngilaq, rektor Poul V. B. Jensen oqarpoq.
Aamma HTX-imi nasartaartoqassaaq. Siulliulluni nasartaartussaq tassaavoq Juuliu Lundblad juunip 19-iani naammassisussaq.
HTX-imi GU-milu aallartinnermiit naammassinnittut 68 procentiussapput ilinniartut 80-it tamarmik nasartaarpata taakkulu ilinniarsimanermut uppernarsaataat juunip 25-at timersortarfimmi agguaanneqassapput.