saqqummiineq

Aajuna Naalakkersuisut mittarfinnut siunnersuutaat

Naalakkersuisut aalajangiisuussagaluarunik, Ilulissani mittarfik Nunatsinni nunat tamalaani mittarfinni takinerpaanngussaaq

Naalakkersuisut aalajangiisuussagaluarunik, Ilulissani mittarfik Nunatsinni nunat tamalaani mittarfinni takinerpaanngussaaq

Naalakkersuisut aalajangiisuussagaluarunik, Ilulissani mittarfik Nunatsinni nunat tamalaani mittarfinni takinerpaanngussaaq.

Knud Kristiansenip (A) marlunngornermi mittarfinnut siunnersuutissani sivisuumik isertuussimasani saqqummiuppaa.

Attaveqarnermut naalakkersuisup Qaqortumi aamma Ittoqqortoormiuni nutaanik mittarfiliornissani neriutigaa, aammalu Nuummi, Ilulissani, Tasiilami aamma Ittoqqortoormiuni mittarfiit pioreersut tallineqarnissaat.

Naalakkersuisut uku siunnersuutigaat:

  • Qaqortumi mittarfik nutaaq 1.200 meteri
  • Ittoqqortoormuini mittarfik nutaaq 650 meteri
  • Ilulissani 'nunat tamalaat akornanni' mittarfik tallillugu 2.200 meterinngortitaq
  • Nuummi 'nunat tamalaat akornanni' mittarfik tallillugu 1.800 meterinngortitaq
  • Tasiilami 'atlantikup avannaani' mittarfik tallillugu 1.200 meterinngortitaq

Naalakkersuisooqatigiit siunnersuutigisaanni angallaffiunerusut Nuuk aamma Ilulissat mittarfimmik allamik aqqusaarseqqaarani tikinneqarsinnaanngussapput, tamannalu Nunatsinni angalariaatsip allanngorujussuarneranik kinguneqassapput, immaqalu timmisartortitseqatigiiffinnut aningaasartuutikinnerulertitsissalluni.

Nuummi mittarfik takinerusoq
Mittarfinnut pilersaarut amerlanerussuteqartut tapersersoraat naatsorsuutigineqartariaqarpoq, siunnersuut naalakkersuisooqatigiinneersuummat.

Kisianni naalakkersuisooqatigiit siunnersuutinut minnerusunulluunniit namminneq Inatsisartunut ilaasortaatitaminnit tapersersorneqarnissartik unamminartuutikkaat piviusuuvoq.

Uani siunnersuutigineqartumi Naalakkersuisut qaammatini arlaqartuni isertuullugu pilersaarusiugaanni, Nuummi 1.800 meterimik mittarfiliortoqarnissaanik siunnersuuteqarneq nutaartaavoq, siullermik 1.200 meteriunissaa siunnersuutaagaluarpoq.

Takissuseq nutaaq ajornartorsiutaasoq
Timmisartut akunnattumik sivisussusilimmik tingisinnaasut mittarfimmit 1.799 meteritut takitigisumit Danmarkimut timminissamut ajornartorsiorsinnaasut Air Greenlandip AG-mut oqaluttuaraa, quasarpallu tamanna ajornavittoq.

Atlantiku qulaallugu timmisartoq Norsaq takissutsimi tassani qangattarsinnaananilu missinnaanngilaq, timmisartortitseqatigiiffik Namminersorlutik Oqartussanit pigineqartoq taama naliliivoq.

Atuaruk: Nuummi mittarfissaq siunnersuutigineqartoq timmisartorsuup atorsinnaanngilaa

Kangerlussuarmut nutaarsiassatsialaanngitsoq
Nunaqarfik mittarfeqarfiusoq Kangerlussuaq, piffissami kingullermi annikitsunik annertuunillu inuussutissarsiornerup tungaatigut suliniuteqarfiuneruleriartortoq, nunami kingullertut tikinneqarfiunerpaajunnaarnissamut piareersartariaqarpoq.

Knud Kristiansenilli Naalakkersuisut Kangerlussuarmi Mittarfik takissusaa taamaatsiinnarlugu siunissami qaninnerusumi attatiinnarneqarnissaa kissaatigigaat tusagassiortunut katersuutsitsinermini erseqqissarpaat.

Kisiannili Atassummi politikerip Nuummi aamma Ilulissani mittarfiit tallineqarpata angallannerullu ilusaa allanngortippagu 'siunissami atuuffia oqaloqatigiissutigineqartariaqartoq' Radiaviisimut nassuiarpaa.

Kangerlussuup qulakkeernissaa akisunerusoq
Nunatsinni maanna mittarfinni annersaasup Kangerlussuarmiittup siunissamut qulakkeerneqarnissaanut aningaasartuutissat aamma naatsorsuinermi ilanngunneqarput.

Naatsorsuinerup qanoq annertutiginera nikerarsimasoq aasarli annertuumik oqallisaaqisoq.

Kangerlussuarmi illuni atortorissaarutit nutaanngilisimammata aningaasaliissutit 1,9 milliardit koruunioratarsinnaanerat naalakkersuisooqatigiit ullumi oqaatigaat.

Allaaserisat mittarfinnut tunngasut tamaasa uani atuakkit

Powered by Labrador CMS