siulittaasumik qinersineq
Aajuna IMAK-p siulittaasortaava
Pissaganartumik qinersinerup kingorna, Birthe Møller Therkildsen, IMAK-imi siulittaasutut qinerneqarpoq.
IMAK-ip Sinniisoqarfiata Ilulissani ataatsimiinnerani siulittaasussatut sassartut pingasuupput, taamaattumik pissangasoqarpoq
IMAK-imi siulittaasutut ukiuni tulliuttuni sisamani sulisussanngorpoq Nuumminngaanneersoq Birthe Møller Therkildsen Nuussuup Atuarfiani ilinniartitsisut sinniisuat IMAK-imilu siulersuisuni ilaasortaq, suliatigut peqatigiiffik tusagassiuutinut nalunaarummi allappoq.
Siulittaasuusimasoq atuarfimmi pisortanngussaaq
Taamaasilluni taassuma Karl Frederik Danielsen Nanortaliup atuarfiani pisortatut atorfimminut uterusussimasoq, taarserpaa.
Aamma atuaruk: Ilinniartitsoq: Imminut illersornermut pikkorissassaagut
Siulittaasutut tunuartoq Karl Frederik Danielsen tunualernermini oqaatsinik kusanartorpassuarnik unnersiutigineqarluarpoq. Siulittaasunngortussarlu pitsaanerpaanik angusaqarnissaanik kissaallugu.
Siulersuisunullu ilaasortassat sinneri sinerissami qinersivinni qaammammi matumani kingusinnerusukkut qinerneqartussaapput. Manna pillugu annertunerusumik paasisaqarusukkuit imak.gl alakkariaannaavat