Aajuku Ujarassiorit 2014-imi ajugaasut

Aningaasat 120.000 koruunit akileraaruteqanngitsut ujassiortitsitsilluni unammisitsinermi ‘Ujarassiorit’-mi ajugaasunut ataasinngornermi tunniunneqarput.

Ukiormanna unammisitsinermi ajugaavoq Narsarmiu Laura Jensen, taanna 55.000 koruuninik akissarsivoq.

Laura Jensen Narsap avannaani Eqaluit Iluanni sumiiffinni imminnut qanittuni pingasuni ujaqqat aatsitassartallit qaarsumeersut nassaarisimavai

- Misissorneqarnerisigut paasinarsivoq 3-4%-imik zink-imik, 0,3 %-imik aqerlumik aamma tonsimut 500 gram-imik molybdenimik akoqartut. Laura Jensenip ujaqqanik nassaarfimik qularnaatsumik sumiiffiliisimanera ujaqqanillu naammattunik angussusilinnik Ujarassiorimmut tunniussisimanera pissutaalluni nassaarfiup nunaata sananeqaataanut tunngasut ujarassiornikkut paasissutissat pingaaruteqartut pissarsiarineqarput, Namminersorlutik Oqartussavat tusagassiuutinut taama allapput.

- Aasat tamaasa ujaqqanik katersisarpugut, umiatsiamik angalaartilluta nunamulluunniit igaasariartilluta ujarassiortarpugut meeqqavullu ujaqqat suuneri suminngaanneernerilu pillugu oqaluttuarlutigit, taama oqaluttuarpoq Laura Jensen Ujarassiorimmi peqataasartoq. Laura Jensen 1997-imi Ujarassiorit-mi ajugaasutut toqqarneqarpoq kingornalu ukioq alla ajugaasut tulliattut aamma toqqarneqarsimalluni.

Aappaattut akissarsiassaq Saqqamut
Ukiormanna aappaattut akissarsiassaq akileraarutitaqanngitsunik 25.000 koruuninik naleqartoq, Saqqameersumit Dina Jensen-imit pissarsiarineqarpoq.

- Taassuma ujaqqat Saqqap eqqaaneersut aligortaqarlutillu sulfidenik aatsitassartallit akoraat 26 % zink, 8% aqerloq siilvilu tonsimut 80 gram, Namminersorlutik Oqartussat allapput.

Pingajuusutut marluk akissarsitinneqarput
Ukiormanna inuit marluk pingajuusutut akissarsitinneqarput immikkullu akileraarutitaqanngitsunik 10.000 koruuninik akissarsitinneqarlutik.

Arsummiit Ejnar Jakobsen ujaqqamik qaarsumeersumit sulfid-italimmik nassaarsimasoq. Ujaqqarak kanngussammik 0,9 %-imik kuultimillu tonsimut 0,1 gramimik akoqarpoq

Pingajuattut akissarsisup aappaa Qaarsormiuuvoq Akaaraq Hansen.

- Ujaqqamik agat-imik Qaarsut kitaaneersumik silineqarluni kusanartutut pinnersaasiarineqarsinnaasumik nassiussaqartoq, Namminersorlutik Oqartussat taama allapput.

Sisamat tamarmik 5.000 koruuninnapput
Inuit sisamat akileraaruserneqanngitsunik 5.000 koruuninik ukiormanna immikkut akisssarsitinneqarput:

• Nuummiu Peter Lynge Petersen Nuup kujammut kangiani Ameraliup paavani molybdænglans-imik nassaartoq.
• Hans Peter Lennert, Sisimiut, ujaqqamik aligoqqiinik akoqartartumik kimberlit-imik Kangerluarsuup Ungalliup paavani nassaartoq.
• Tobias Danielsen Kullorsuarmeersoq ujaqqamik hæmatitsimik 63 % - imik savimminermik akulimmik Kullorsuup eqqaani Saarliani nassaartoq.
• Hans Sanimuinnaq Kuummiuniit ujaqqamik agiarmik savimminissartarlimmik Tasiiliap Illoqqortoormiullu akornanni Kangerlussuup kangiani nassaartoq.

Nuna tamakkerlugu ujarassiorluni unammisitsisarneq ”Ujarassiorit” ukiut 26-issaanni maanna ingerlanneqarpoq.