Aajuku politiit nutaat

Nunarput ullumi sisamanik politiitaarpoq.

Angutit taakku tulluusimaaqalutik soraarummeersimanermut uppernarsaatissaat, ullumi tallimanngornermi Nuummi, politimesterimit Bjørn Tegner Bayimit tunniunneqarput.

Politiinngortut tassaapput Micha Simonsen, Jaaku Andreassen, Hans Peter Didriksen kiisalu Inunnguaq Olrik.

Misigisat nuannernersaat

Politiinngortut marluk Sermitsiaq.AG-p oqaloqatigisimavai.

Ilinniarneq misigisaqangaatsiarfiusimasoq, 23-nik ukiulik Inunnguaq Olrik Qeqertarsuarmiu oqaluttuarpoq.

- Ilinniarnitta nalaani assigiinngitsorpassuarnik misigisaqarsimavugut, sakkortuut kisiannili aamma nuannersorpassuit. Politeeqarfimmi ataqatigiinneq misigisanni nuannernerpaavoq. Ataqatigiilluarpugut, taanna oqarpoq.

- Ilinniarnerup nalaani suna unammillernarnerpaasimava?

- Suliat ilaat qaangeruminaassinnaasarput, aqqusaagassuaqartarpugummi. Piffissap ilaa sakkortusinnaasarpoq. Ilinniarnerup nalaani timikkut aamma unammillernangaatsiarsimavoq, tassani imminut illersornissarput ilinniarsimavarput. Ilinniarnerup ingerlanerani piumasaqaataasut annertusimaqaat, ataatsimulli isigalugu ilinniarneq nuannersorujuusimavoq, Inunnguaq Olrik oqarpoq, taanna ilinniakkani naammassiguniuk Sisimiuni sulilertussaavoq.

Nanortalimmukassaaq

Ilinniarnerup nalaani polititeori, nalunaarusiorneq timimillu atuineq Micha Simonsenimut misigisaq nuannernerpaasimavoq.

- Unnerluussinerit qanoq allanneqarnissaat ilinniarsimavarput, ilikkagaqarnaqaalli. Imminulli illersornissamut sungiusarneq nuannernerpaasimavoq, Micha Simonsen oqarpoq, taanna Nanortalimmi politiitut sulilissaaq.

- Ilinniarnermi eqqartuussivilerineq unammillernarnerpaajusimavoq, inatsisit ilinniartariaqarsimavagut, aammalu inatsisit iluamik nassuiaatigineqarnissaat ilinniarsimallutigit. Sulianulli atatillugu nassuiaanerit pitsaasumik ingerlattariaqartarlutigit. Inatsisit suut unioqqutinneqarnersut takujuminartorujuuvoq, taassumali saniatigut inatsisit allat suut unioqqutsinneqarsimanersut aamma paasinartarparput. Ilinniarnerup nalaani taanna unammillernarpaatut isigaara, Micha Simonsen oqarpoq.

Allaaserisap ataani assit takukkit