Aaja: Inissiisarfinni nakkutilliisunut akissarsiat qaffasinnerusut
Folketingimut ilaasortap Aaja Chemnitz Larsenip (IA) pinerlussimasut inissiisarfiini nakkutilliisut akissarsiaat tupaallaatigai. Taamattumillu qallunaat inatsisinut atuutsitsinermut ministeriat Søren Pape Poulsen ataatsimeeqatiseraa.
Pinerlussimasunut inissiisarfinni nakkutilliisut sulisoriinnarnissaasa ajornakusoornerinut aamma atajuartitsinermut pitsaassutsimullu akissarsiatigut atukkat ajoqutaasut, IA-mi politikeri isumaqarpoq.
Suliffissani 29-ni 17-it
Nuummi ullumikkut pinerlussimasut inissiisarfiini nakkutilliisut 29-nik sulisoqartussatut naatsorsuussami 17-iusut, taassuma tikkuarpaa.
Pinerlussimasut inissiisarfiini nakkutilliisut peqatigiiffiat oqaloqatigaara, taakkulu akissarsiatigut atugaat tupaallaatigisorujussuuakka. Folketingimi ilaasortatut naalagaaffiup sulisuni taama naleqqutinngitsigisumik atugaqartikkai kanngusuutigaara. Ilisimavara unammilligassartaqartoq, kisianni akissarsiatigut atukkat naleqqutinngingaarmata paasiuminaatsippara. Nakkutilliisut pinerlussimasut isumagisarpaat, taamaalillutillu aamma tamatta paaraluta, kisianni sulinermikkut iluamik atugaqartinneqanngillat. Naalagaaffik inuiaqatigiinni suliassaq taama pingaaruteqartigisoq naalagaaffimmut ajortumik aaqqiiffigisinnaanngilaa, Aaja Chemnitz Larsen tusagassiuutinut nalunaarummi oqarpoq.
Akissarsiat qaffanneqassapput
Aqqutissaq ataasiinnaavoq, tassa akissarsiat tulluartumik qaffanneqassapput, folketingimi ilaasortaq isumaqarpoq, taassuma Fængselsforbundet ataatsimeeqatiginiarpaa, ataatsimoorluni qanoq iliuuseqartoqarsinnaanersoq paasiniarlugu.