Aaja: Nukappiaqqat issertittarsimanerarlugit oqaluttuarsimanini utoqqatsissutigisariaqarpaa

Nukappiaqqat issuertittarsimanerarlugit salluliaq, kalaallinut isummanut pingiuliuttakkanut annertunerulersitsivoq.

Taama isumaqarpoq IA-p folketingimi ilaasortaatitaa Aaja Chemnitz Larsen, taanna folketingimi suleqatiminut ersarissumik oqariartuuteqarpoq.

- Eqqunngilluinnarpoq, Aaja Chemnitz Larsen (IA) Sermitsiaq.AG-mut oqarpoq.

- Neriuppunga Mette Gjerskov (S) utoqqatsissuteqassasoq.

Atuaruk: Ministeriusimasoq sallulluni kalaallit nukappiarartaat issuertittarsimanerarai

- Sooq nukappiaqqat kalaallit?

Mette Gjerskov (S) salluliorluni nukappiaqqat kalaallit marluk issuertittarsimanerarpai, kingornalu twitter-imini ingerlaartilersimallugu.

Taassuma eqqartuussivinni issuertittarnerit/manissaajartittarnerillu suliarineqartarnerat immikkut sammineqartikkusuppaa, taanna isumaqarpoq tusagassiuuteqarfiit annertuallaamik allaaserinnittartoq.

Pineqartut kanngunarsarneqartut, taanna isumaqarpoq.

Taassuma oqaluttuaa kalaallinut Danmarkimiittunut Kalaallit Nunaanniittunullu ersarissumik kanngunarsaavoq.

- Allamik oqarfiunngilaq niaqolaartoq, oqaaseqartarfimmi, oqaaseqarsimasorpassuit ilaat taama allappoq.

- Sooq nukappiaqqat kalaallit pineqarpat? Danskiusinnaangaluarput, peqatigiiffik Inuit siulittaasorisimasaa, Bitha Metelmann oqaaseqartarfimmi allappoq.

Isummanik pingiliuttakkanik nutaanik pilersitsivoq

Tamannalu Aaja Chemnitz Larsenip aamma sammivaa.

- Uani Kalaallit Nunaat atormagu assut uggornarpoq, taanna oqarpoq.

Taanna isumaqarpoq salluliorluni oqaluttuap qallunaat inuttaasuisa amerlanersaasa kalaallinut isummanik pingiliuttangaannik allamik pilersitsisoq, taakkumi Kalaallit Nunaannut ilisimasaat killeqareerpoq.

- Isummanik pingiliuttakkanik ingerlaalertussamik nutaamik pilersitsivoq, Aaja Chemnitz Larsen oqarpoq.

Kinguaassiutinik peertitsisarnerit ilisimaneqanngillat

Oqaluttualli piviusumut naapertuutinngilluinnarnera, taassuma erseqqissaatigaa.

Meeqqat illersuisuunikuunermini kalaallit meerartaannut kusananngitsuliortarnerit suunersut nalunngilluinnarpai, kinguaassiutinilli peertitsisarnerit kusanaatsuliortarnernut ilaanngitsut, taanna oqarpoq.

- Meeqqat illersuisuattut sulinerma nalaani issuertissimasumik manissaajartissimasumilluunniit tusarnikuunngisaannarpunga, taanna oqarpoq.

Taamaammat taassuma tupigusuutingaa, Mette Gjerskovip sallulluni oqaluttualiornermini sooq Kalaallit Nunaannut eqqarsaatigisimaneraa.

- Kalaallit Nunaannut ilisimasakitsuaraasimassaaq.

Mette Gjerskov oqaaseqartinniarlugu Sermitsiaq.AG sulissuteqarpoq.