isumaqatiginninniarneq

Aaja: - Løkke eqqortumik alloriarpoq

Illersornissamut isumaqatigiissusiortoqartillugu kalaallit tusaaneqartarnissaasa ministeriunerup oqaaseqarnerata kingorna, Aaja Chemnitz Larsen mianersortumik neriulluarpoq

Aaja Chemintz Larsen, Lars Løkke Rasmussen

Illersornissamut aamma politiit pillugit isumaqatigiissusiortoqartillugu kalaallit politikerit marluk sunniuteqarsinnaapput.

Qaammatip aallartilaarnerani ministeriunerup Lars Løkke Rasmussenip (V) tamanna Sermitsiaq.AG-mut oqaluttuaraa.

- Kalaallit Nunaat sunniuteqarnerulissasoq
Isumaqatiginninniarnerit annertuut Kalaallit Nunaannut pingaarutillit ingerlanneqaraangata, kalaallit Folketingimut ilaasortat peqataasarnissaannut, Aaja Chemnitz Larsen (IA) piffissami sivisuumi ilungersuuteqarnikuuvoq.

- Ministeriunermit Lars Løkke Rasmussenimit oqariartuutigineqartoq eqqortumik alloriarneruvoq, Inuit Ataqatigiillu Folketingimi suliniuteqarnerat Kalaallit Nunaannut piffissami qaninnerusumi ungasinnerusumilu sunniuteqarmat nuannaarutigaara, Aaja Chemnitz Larsen (IA) Sermitsiaq.AG-mut oqarpoq.

- Assigiinngisitsineq
Isumaqatiginninniarnerit annertuut isumaqatigiissutigineqartillugit, kalaallit ilaasortat ilaatinneqartannginnerat, Aaja Chemnitz Larsenip kingullermik maajip naanerani Folketingimi inaarutaasumik oqallittoqarnerani isornartorsiorpaa.

Partiit isumaqatigiissusiortut suna isumaqatigiissutigisimaneraat kingorna atuarsinnaasarpaat.

- Folketingimi ilaasortani tullertut isigineqarnerput assigiinngisitsineruvoq, tunngaviusumillu inatsimmi naligiimmik ilaasortaasugut allaqqalluni, tassunga atatillugu taama oqarpoq.

Isumaqatiginninniaqataaneq ajortut
Kisiannili Aaja Chemnitz Larsenip aamma Aleqa Hammondip isumaqatiginninniartunut peqataalernissaannik, Lars Løkke Rasmussenip oqariartuuteqarnera isumaqanngilaq, killormorluinnaavoq.

- Ilaasortat Atlantikup Avannaaneersut isumaqatiginninniarnerni taakkunani isumaqatiginninniaqataasussatut maanna oqaatigisinnaanngilakka. Tamanna ammasumik oqaatigisariaqarpara, Sermitsiaq.AG-mut taanna oqarpoq.

- Oqariartuuteqarneq qanoq isumaqarpa?
Aningaasaqarnermut inatsisissap kingullermik isumaqatiginninniutigineqarnerani Aaja Chemnitz Larsenip sunniuteqarfigisimasaanut, aallarniutaasumik naalakkersuisunik oqaloqatiginninnernut ilaatinneqarsinnaasut taassuma neriorsuutigaa.

- Ministeriunerup oqariartuutaata qanoq kinguneqarnissaata takunissaa qilanaaraara, maanna naalakkersuisunik oqaloqateqartarnermit qanoq allaanerussuteqarnersoq ilanngullugu, Aaja Chemnitz Larsen oqarpoq.

Isumaqatigiissutit aalajangiissut isumaqatigiissutigineqartillugit isumaqatiginninniaqataasarnissaq suli anguniarsaraa.

- Kalaallit Nunaannut tunngasunut politikkikkut isumaqatiginninniaqataasarnissaq Inuit Ataqatigiit Folketingimi suli anguniagaraat.

Powered by Labrador CMS