Issittumi iliuusissat
Aaja: Issittumut periusissiap nutaap inuiaqatigiit iluaqutsissavai
Danskit nunanut allanut tunngasunut ministeriata Anders Samuelsenip (LA) aamma ineriartortitsinermut ministerip Ulla Tørnæsip (V) naalakkersuisoqatigiit VKLA-p nunanut allanut sillimaniarnikkullu iliuusissaat pingasunngornermi saqqummiuppaat
Danskit naalakkersuisuisa nunanut allanut sillimaniarnikkullu 2017-18-mut iliuusissaani Issittoq qulequttat pingaarnerit tallimat ilagaat.
Danskit nunanut allanut politikkianni Issittoq pingaarnerit tallimat akornanniimmat, Inuit Ataqatigiinnit Folketingimut ilaasortap Aaja Chemnitz Larnsenip qiimmatsaatigaa.
- Issittumik ukkataqarnerulerneq pissusissamisoorpoq, Inuit Ataqatigiit Folketingimi taamatut Kalaallit Nunaata nunanut allanut sillimaniarnermullu tunngasuni sunniuneqartinnera taamatut qulakkeermagu allannguuteqartitsineq takutippaa. Tassami Nunatsinnut iluaqutaasussanik angusanik pilersitseqataavoq, IA-mi politikeri tusagassiuutinut nalunaarummi oqarpoq.
USA-mik suleqateqarneq taakkartorneqanngilaq
Taannalu nangippoq:
- Kalaallit Nunaanni aningaasaqarnikkut ineriartornerup ukkanneqarnera, illersornikkut aamma issittumi ilisimatusarnermik nukittorsaanerit tamarmik kalaallinut inuiaqatigiinnut pitsanngorsaataapput, taakku folketingimi sulinermi tikkuartornikuuagut, naalakkersuisullu taakku pingasut ukkatarilermagit nuannaarutigaara.
Kalaallit Nunaata, Danmarkip aamma USA-p akornanni suleqatigiinneq iliuusissani ataasiarluniluunniit taaneqanngimmat, Inuit Ataqatigiit Folketingimut ilaasortaatitaata tupigusuutigaa.
- Amerikamiut Kalaallit Nunaanniinneranni suliat amerlasuut naammassineqanngillat, taakku iliuusissani taaneqanngillat. Suliat Pituffimmut imaluunniit sakkutooqarfiusimasuni avatangiisinik mingutsitsinerit naalakkersuisut pingaartinngikkaat paasineqarsinnaavoq. Suliat taakku Nunatsinni aningaasaqarnermut aamma avatangiisinut pingaaruteqartorujussuummata tamanna pakatsinarilluinnarpara, Aaja Chemnitz Larsen oqarpoq.