Aaja: Eskimologi pingaarnerutinneqannginnera kukkulluinnarpoq

Københavns Universitetip pisortaqarfianit tallimanngormat ualikkut sulisunut aamma ilinniartunut allagaq nassiuppaat, 2016-imi Det Humanistiske Fakultip immikkoortuini fagini minnerusunit 100 millionit koruuninik sipaarniartoqarnerani 13-ini ilinniartunik aallartitsisarnissaq unitsinneqartoq tassani nassuiaatigineqarpoq.

Taakku ilinniarfiit pingaarnersiugaanngitsut ilagaat Eskimologi.

Tamannalu kukkulluinnartumik tulleriaarinerusoq, Inuit Ataqatigiinni folketingimut ilaasortaq Aaja Chemnitz Larsen oqarpoq.

Atuaruk: Eskimologi-p matuneqarnera ilinniagaqartut tupassutigeqaat

Soqutigineqaleraluttuinnartoq
Aaja Chemnitz Larsen (IA) aalajangiineq paasiuminaatsippaa, ilinniarnermut ilisimatusarnermullu ministeri Esben Lunde Larsen (V) maanna ilanngullugu.

- Kalaallit Nunaannut aammalu Issittumut soqutiginninneq annertusigaluttuinnarnera eqqarsaatigalugu, taava ilinniakkat Eskimologi aamma Arktiske Studierip matuneqarnissaanik siorasaarineq isumaqarpunga tulleriaarineq equngalluinnartoq. Ilinniagaq ilisimasanik nutaanik aamma kulturikkut paasinnittariaatsimik pingaartumik qulakkeerinnittoq, folketingimi ilaasortaq tusagassiuutinut nalunaarummi allappoq.

Ilinniagaq Kalaallit Nunaannut Danmarkimullu pingaartuusoq, taanna isumaqarpoq.

Ministerimut apeqquteqartoq
- Eqqaamasariaqarparpummi ilinniagaq ungasissumut asiamiutut ilinniagaanngimmat, aammali pissuteqarluartup, kisiannili ilinniagaq naalagaaffeqatigiinnermut attuumassuteqarluinnartorli matuneqarpat, Kalaallit Nunaannut aamma Danmarkimut annaasaqaataassaaq annertooq, Aaja Chemnitz Larsen erseqqissaavoq.

Filketingimi ilaasortap ernumassutai aallavigalugit, Aaja Chemnitz Larsen, ullumi ataasinngornermi ilinniartitaanermut ilisimatusarnermullu ministeri Esben Lunde Larsen (V) arlalinnik apeqquteqarfigaa, tassanilu ministeri pingaarnerutsitsinnginnerunermut nassuiaaqquneqarpoq.

Atuaruk: Universitetip fagi Eskimologi unitsippaa