Kuannersuit
Aaja Chemnitz Larsen urani pillugu tusarniaatitsisoq
Folketingimi tusarniaanerup inatsisinik suliaqarneq paasititsineq tunngavigalugu pinissaa qulakkiissavaa
Kalaallit Nunaanni uranip piaarneqarnissaa aamma avammut niuerutiginissaanut inatsisissatut siunnersuut, Folketingip apriilimi siullermeerlugu suliarissavaa.
Inuit Ataqatigiit folketingimut ilaasortaatitaat, Aaja Chemnitz Larsen, tassunga atatillugu Folketingimi urani pillugu tusarniaanissamut suliniuteqarpoq, inatsimmik suliaqarnerup paasititsineq tunngavigalugu pinissaa qulakkeerniarlugu.
Atuaruk: Danmarkip Nunattalu uranimik avammut niuernissaq isumaqatigiissutigaat
Marsip 16-iat
Tusarniaaneq tamanut ammasuussaaq, marsip 16-ianilu pingasunngornermi Christiansborgimi pissalluni. Folketingip Kalaallit Nunaat pillugu ataatsimiititaliaa qaaqqusisuussaaq, taamaattorli Det Udenrigspolitiske Nævn, Illersornissamut aamma Nunanut Allanut ataatsimiititaliami ilaasortat, Inatsisartut Aatsitassanut aamma Nunanut Allanut Isumannaatsuunissamullu ataatsimiititaliaat peqataanissaminnut tikkilluaqqusaapput.
- Uagut folketingimi ilaasortatut inatsisiliornerput aamma aalajangiinerput, sapinngisamik paasititsineq tunngavigalugu aalajangiinerput tusarniaanerup qulakkiissavaa. Qallunaat folketingimut ilaasortaatitaasa amerlasuut assersuutigalugu, Kalaallit Nunaat pillugu aalajangerneq, soorlu uranimik qallueqqusiunnaavinnerup atorunnaarsinneqarnera, politikkikkut Inatsisartuni amerlanerusussuteqalaaginnartut aalajangigarigaat maluginngilaat, Aaja Chemnitz Larsen tusagassiuutinut nalunaarummi oqarpoq.
Folketingi siulliussasoq
Taakku uranimik piaanissamut aamma niuernissamut inatsisissatut siunnersuutit marluk Folketingimi suliarineqaqqaarnissaat pilersaarutaavoq, tassanngaanniit Inatsisartuni siullermeerneqassapput.
Aaja Chemnitz Larsen naapertorlugu, tamanna Naalakkersuisut Inatsisartut ilannguteqaarnagit akuerisimavaat.
- Naalakkersuisut Inatsisartut qaangiinnarlugit, suliamut Kalaallit Nunaannut pingaaruteqarluinnartumik Folketingi suliarinninnissaanik akuersinerat isornartorsiunngitsuugassaanngilaq, taanna erseqqissaavoq.
Atuaruk: Uranitalinnik tunisassiornissaq imaaliallaannaq pinavianngitsoq