Kalaallit Nunaannut ataatsimiititaliaq
Aaja: Ajornerulissaqaaq
IA-mit Folketingimut ilaasortaq, Aaja Chemnitz Larsen, talerperlerneersunit Kalaallit Nunannut ataatsimiititaliami siulittaassuuffissani tiguneqartoq isumaqarpoq
Folketingimut qinigaarlaaq Inuit Ataqatigiinneersoq, Aaja Chemnitz Larsen, Kalaallit Nunaannut ataatsimiititaliami kalaallimik siulittaasoqassasoq kissaateqarpoq. Kisianni talerperliit partiit ilaatigut Dansk Folkeparti, amerlanerussuteqarnertik atorlugu Kalaallit Nunaanni ataatsimiititaliami siulittaasuutitaqarnissartik piumasaraat. Tamannalu ajortoq, IA-p folketingimut ilaasortaa isumaqarpoq.
- Kalaallit Nunaannut ataatsimiititaliamut siulittaasuuffik partiinut talerperlernut tunniunneqassappat ajornerulissaqaaq. Kalaallit Folketingimut ilaasortat siornatigut Kalaallit Nunaannut ataatsimiititaliaq siulittaasuuffigiuaraluarpaat, Folketingimut ilaasortaq Aaja Chemnitz Larsen Sermitsiaq.AG-mut oqarpoq.
Taassuma tunngavilersuutigaa maanna danskit partiivisa kalaallinut apeqqutit tunngasut Folketingimi susassaqarfiit suliarilissagaat, kalaallinik folketingimi ilaasortanit Kalaallit Nunaanni pissutsinut ilisimasaqannginnerullutik.
Nalinginnaasumik Kalaallit Nunaannut ataatsimiititaliami partii Kalaallit Nunaanneersoqtaaguunneqarnerpaasoq siulittaasuutitaqartaraluarpoq. IA-lu taaguunneqarnerpaagami, Aaja Chemnitz Larsen, siulittaasunngussagaluarpoq.
Atuaruk: Kalaallit Nunaannut Ataatsimiititaliami siulittaasoq talerperlerneersuuvoq
Aaja Chemnitz Larsenip ilisimatitsissutigaa, sinniisutut nunanut allanut ataatsimiititaliami aamma europamut ataatsimiititaliamut inississimalluni. Aammalu aalajangersimasumik Kalaallit Nunaannut ataatsimiititaliami, inatsiseqarnermut aamma illersornissamut ataatsimiititaliami inissikkusulluni suliniuteqarnerarpoq.
Eqqumiitsumik nutaaliorneq
Siumup Folketingimut ilaasortaatitaata Aleqa Hammondip tupigusuutigaa, partiit talerperliit maanna Kalaallit Nunaannut ataatsimiititaliaq siulittaasuuffiginialermassuk.
- Nutaaliaq tamanna eqqumiitsuuvoq, talerperliit Folketingip Kalaallit Nunaannut Ataatsimiititaliaa atornialersimassavaat, tusagassiorfinnut nalunaarut naapertorlugu Aleqa Hammond oqarpoq.
Kalaallit Folketingimut ilaasortaatitaasa qinigaaffimmi nutaami suut sulissutiginiarneraat atuarusukkukku, aviisit Sermitsiap Aleqa Hammond aamma Aaja Chemnitz Larsen Folketingimi sulinissaat apersornikuuaat. Aviisi uani pisiarisinnaavat.