Aaffattassat akuerisariaannanngorput

Aarrit ukiuni kingullerni amerliartorsimapput. Tamanna biologit kisitsinerisigut paasineqarpoq, kisitsinerlu pisarpoq ukiut sisamakkaarlugit tallimakkaarlugilluunniit. Kingullermik eqqoriarneqarpoq Qaanaami aarrit 1500 missaanniittut kitaanilu 2600 missaanniittut, tunumilu 1900 missaanniillutik. Tamanna tunuliaqutaralugu biologit aaffattassanik inassuteqarput, inassutigaallu 2014-imiit 2018-imut ukiumoortumik tunumi 18-inik, Qaanaami 89-inik kitaanilu 69-inik pisassiisoqassasoq.
– Tunumut inassuteqaatit siusinnerusukkut inassuteqaataasartunut sanilliullugit allanngunngillat, nutaamik inassuteqarnissamut biologitigut nutaanik paasissutissaateqartoqanngimmat. NAMMCO-lli inassutigaa kitaani pisassat amerlineqassasut, tamaani aarrit amerliartormata. Kitaanut inassutigineqarpoq katillugit 100-nik pisassiisoqassasoq, 31-t Canadamut 69-illu Kalaallit Nunaannut. Qaanaami pisassat aamma 29-nik amerlineqarput katillugit 89-inngorlugit, Aalisarnermut Naalakkersuisoqarfimmi AC fuldmægtigi Niels Lyberth oqaluttuarpoq.
Tamanna pivoq tusagassiorfinnut nalunaarutikkut, Den Nordatlantiske havpattedyrs Kommissionip, NAMMCO-mi Siunnersuisoqatigiit, kingullermik ataatsimiinnerisa kingorna.
Biologit inassuteqaataat Naalakkersuisunit akuerineqassapput, Naalakkersuisullu pisassiissutitut inassuteqaatit akueriinnavippatigit Piniarnermut Naalakekrsuisup pisassat agguaassinnaalissavai.
Pisassiisarneq 2006-imi eqqunneqarpoq. Taamaasilluni inuussutissarsiutigivillugu piniartut kisimik aaverniarsinnaapput.
– Isumaqarpunga killilersuineq tamanna qanittukkut allanngortinneqarnavianngitsoq, pisassat piniartut amerlassusaannut sanilliullugit killeqaqimmata. Amerlasuut isumaqarput pisassat ikippallaartut, inassuteqaatilli malitsigisaanik aalajangiisussaavugut, Niels Lyberth oqarpoq.