Qeqqata Kommunia
Aaffanniarneq Naalakkersuisunit sivitsorneqarpoq
Kommunip ataatsip aaffanniarsinnaanera Siumumit Karl-Kristian Krusep sivitsorpaa
Aalisarnermut, piniarnermut nunalerinermullu naalakkersuisup Siumumeersup Karl-Kristian Krusep Qeqqata Kommuniani Kitaani ukiukkut aarrit piniagaaffianit immikkut majip 15-iata tungaanut piniarneqarsinnaaneri sivitsorneqarnissaat akuersissutigaa.
Aaffanniarnissamut sivitsuineq naalakkersuisumit ernumassutigineqanngilaq.
- Qeqqata Kommuniani aaffattassiissutit sinnerneqanngippata piniarneqarnerisa majip 15-ianut ulloq taanna ilanngullugu sivitsornissaa aammalu piffissamik sivikinnerpaamik aarrit akornusersorneqarpata ajoriffissaqartinneqanngilara, Karl-Kristian Kruse tusagassiutinut nalunaarummi oqarpoq.
Apriilip 21-at ilanngullugu aqutsiveqarfimmi taamaallaat aarrit 18-t pisarineqarsimanerat pissutaalluni aaffanniarsinnaaneq sivitsorneqarpoq.
Qeqqata Kommuniata Pisuussutit Uumassusillit pillugit Ataatsimiititaliaa Qeqqata Kommuniani aarrit piniagaanerisa majip naanissaanut sivitsorneqarnissaannik qinnuteqarpoq. Qinnuteqarnernut tunngavigineqarput ukioq manna aarrit piniagaaffiata nalaani kitaata sikuunerujussua aammalu sumiiffinni silap unerisimannginnerujussua piniarnermi annertuumik killiliimmat.
Aamma tunngavigineqarpoq ulluni makkunani neqissaqarniarneq annertuumik ajornarluinnarmat sumiiffimmilu puiseqanngilluinnarmat sila sikullu, sikut siamasinnermik pulataarnissaq piniartunut nangaanarluni. Tamatumunnga ilutigalugu silap unerisimannginerata kingunerisimavaa neqissaqarniarneq ajornarluinnarluni.
Immikkut akuersissuteqarneq taamaallaat ukioq manna 2015-imi atuutissaaq.