Aaatsitassat pillugit apeqquterpassuit nutaat

Inatsisartunut ilaasortap Naaja Nathanielsenip, IA, Naalakkersuisut aatsitassanut poltiikkiat tupigusuutigaa, Inatsisartut Aatsiytassanut ataatsimiititaliaata juunip 2-anni Naalakkersuisut "Uuliamut Aatsitassanullu 2014-2017-imut iliuusissiaa" nutaaq tusarniaavigereeraalu. tusarniaanermi ataatsimiititaliap Naalakkersuiusut "Uuliamut Aatsitassanullu 2014-2017-imut iliuusissiaata" imarisaa annertunerusumik paasisaqarfigerusuppaa. Sapinngisamik amerlanerpaat paasisaqarniassammata ataatsimiititaliap tusarniaaneq ammasumik ingerlappaa.

Naaja Nathanielsenip erseqqissarpaa tusraniaaneq Naalakkersuisut periusissiaata ilaginngikkaa. Naalakkersuisulli soorunami qaaqquneqarput ilisimasaminnik Ataatsimiititaliamik innuttaasunillu avitseqatigiinnissaminnut. Inuussutissarsiornermut Aatsitassanullu Naalakkersuisoq peqataavoq saqqummiussakkut panelimilu oqallinnermi peqataalluni.
Tamanna takuneqarsinnaavoq paragraf 37 naapertorlugu apeqqutaani, tassani inuussutissarsiornermut aatsitassanullu Naalakkersuisoq Jens-Erik Kirkegaard apeqquterpassuarnik apeqquteqarfigalugu.
Tassami tupigusuutigaa inuussutissarsiornermut aatsitassanullu Naalakkersuisoq ataatsimiinnermi oqarmat "Uuliamut Aatsitassanullu 2014-2017-imut periusissiaq" tassaasoq ”iliuusissiaq naleqqussarneqarsinnaasuusoq” piffissallu ingerlanerani allanngortinneqarsinnaasoq.
Taamaattumik paaserusuppaa periutsip ilai sorliit Naalakkersuisut allanngortinniarneraat, aammalu periuseq qaqugu naammassineqavittussatut naatsorsuutigineqarnersoq.
– Tamatumami paasinissaa innuttaasut suliffissuaqarfiullu qanoq naatsorsuutiginninnissaannut pingaaruteqarpoq, Naaja Nathanielsen tikkuaavoq.
Tusarniaasitsinerup nalaani professor Minik Rosingip oqaatigivaa iliuusissiamut piffissaliussap iluani oliasiortoqalernissaa piviusorsiornerunngitsoq.
Taamaattumik Naaja Nathanielsenip paaserusuppaa Naalakkersuisut isumamut tamatumunnga isumaqataanersut.
– Imaluunniit iliuusissianut piffissaliussat marluk takkukkumaartut iluanni ataatsimik marlunniilluunniit oliasiorfeqalernissaanik naatsorsuuteqarnertik Naalakkersuisut attatiinnarpaat?, taanna aperivoq.
Naaja Nathanielsenip aamma uppernarsaqquvaa aatsitassanit aningaasaateqarfissaq ilaatigut Nunatta aatsitassarsiornermi peqataanissaanut atorneqassanersoq. Taamaassappat aamma paaserusuppaa naalagaaffiup tamatumani peqataanera suli pissanersoq Nunaminerals aamma Nunaoil aqqutigalugit imaluunniit Naalakkersuisut allanik pilersaaruteqarnersut.
Kiisalu Naaja Nathanielsenip ujartorpaa selskabip "KPMG"p ullumikkut government take model-imut nutaamut tunngatillugu iliuusissiamut atatillugu suli nalorninartorpassuaqarnerarlugu oqaaseqarnerannut Naalakkersuisut qanoq isumaqarnersut.
Naaja Nathanielsenip naatsorsuutigaa apeqqutit tamarmik ullut suliffiusut qulit iluanni akineqarumaartut.