Ilulissat
94-nik ukiullip tillinniat sakkulisartut qimaatippai
Utoqqat pisiniarfeeraatilik eqqarsariataarpoq tillinniat kikkuuneri suli ilisimaneqanngitsut sakkulerlutik pisiniarfeeraataanut ujajaariaraluarmata
Tillinniat kikkuuneri suli ilisimaneqanngitsut arfininngormat Ilulissat sakkulerlutik ujajaariaraluarput. Pisiniarfeeqqamilli piginnittoq 94-nik ukiulik ulloq taanna pisiniarfeeqqami sulisoq qunuummerani politiinut sianerasuarpoq.
Atuaruk: Ilulissani sakkulerluni ujajaariartoqarpoq
Angutit marluk kiinarpallit sakkulerlutik Anton Geislerip Ilulissani pisiniarfeeraataanut arfininngornermi ujajaariaraluarput. Pinerluttulioriarnertilli tamanna pissarsissutiginngilaat.
- Oqarasuaat tigupallappara politiillu oqaluuttuusaarlugit oqalullunga pisiniarfeeraatinnut aggipallaqullugit, pisiniarfeeqqamik piginnittoq Anton Geisler februaarimi 95-nik ukioqalertussaq Sermitsiaq.AG-mut oqaluttuarpoq.
Igalaaq aserorpaa
Tillinniap aappaa aallaammik qunusaaraluni aningaasanik tunniussititseriaraluarpoq aappaalu matup eqqaani sissuertuulluni.
- Politiit oqaluussorisimagunaramikkit qimaapput. Sakkulisartulli aallaasip timitaanik ilitsiviup igalaartaa aserorpaa, Anton Geisler pisiniarfeeraatilittut sulinissamut suli sapiutinngivissoq oqaluttuarpoq.
Tillinniat inuinnaat aqqutaatigut Uiarsaariap Enok Kristiansenillu aqqutaa akornatigut avannamut qimaasimapput.
- Tillinniat qimaasut takulersimallugit inuit pisiniarfeeqqamut takuniaapallapput ajunnginnersunga paasiniarlugu, Anton Geisler oqarpoq.
Tillinniat qimaareermata aatsaat Anton Geisler politiinut sianerpoq nalunaarullu arfininngormat nalunaatuaq 15.45 politiit tiguaat.
Tillinniat isikkui
Tillinniarnermut takunnissimasinnaasut imaluunniit ilisimasaqartut politiit oqaloqatigerusuppaat.
Ujajaariartup aappaa imatut oqaluttuarineqarpoq: Angut inuusuttoq kalaaleq, 170-175 centimeterisut angitigisoq nerinnattuunanilu tuattuunngitsoq. Taanna ataasiaannaq atortakkamik atallaaqarsimavoq nasaasalimmik. Qaqortumik kiinarpalersimasoq isaasa qarngatalu nalaanni putuneqarsimasumik. Aaqqateqarsimassagatinneqarpoq. Nassataraa nammattagaq sinaatungimigut qasersoq aappalungusesoq. Aallaat qasersoq plastikimik timitalik nassarpaa.
Ujajaariartup aappaa imatut oqaluttuarineqarpoq: Angut inuusuttoq, kalaalerpaluttumik isikkulik 170- 175 centimeterimik angissusilik tuattuunanilu nerinnattuunngitsoq. Qernertumik jakkeqarpoq qernertunik qarlippaaqarluni aaqqateqassangatinneqarlunilu. Nammattagaqarpoq qernertuusorineqartumik.
Ilulissani politiit oqarasuaatigaat 701422.