Ittoqqortoormiit
54-inik ukiulik ernerminut toqutsisimasutut pasineqarpoq
27-inik ukiulik, Tunumi tallimanngornermi toqungasoq nassaarineqartoq, angumminit toqunneqarsimassangatinneqartoq, politiit ilisimatitsipput. Ataataasoq eqqartuussivimmut sassartinneqarami pinngitsuunerarpoq
Angut 54-inik ukiulik, angummut inuusuttumut toqutsisimasutut pasineqartoq, toqutaasup ataatarigaa, nunatsinni politiit allattoqarfianni pisortaq, Claus Risbjerg, Ritzauimut ataasinngornermi ilisimatitsivoq.
Toqunneqartoq, angut 27-nik ukiulik, illut ilaanni Ittoqqortoormiini toqungasoq tallimanngormat siumorneqarpoq. Politiit paasissutissiinerat malillugu angut savimmik kapineqarnermi kingorna toqusimavoq.
Toqunneqartup angutaa eqqartuussivimmut sassartinneqareerluni ulluni 26-ni tigummigallarneqalersoq, Claus Risberg ilisimatitsivoq.
Atuaruk: Angut toqungasoq siumorneqarpoq: Angut 54-nik ukiulik toqutsisimasutut unnerluunneqarpoq
Angut 54-inik ukiulik politeqarfimmut tallimanngormat nammineerluni saaffiginnippoq ernerminut savimmik kapisisimanerarluni. Politiit oqarnerat naapertorlugu piffissami tassani ilisimanngilaa ernini toqussimallugu.
Ernerami 27-nik ukiulik savimmik kapineqareernermi kingorna angerlarsimaffimminnit anisimavoq.
Kingorna eqqaamiuminnut isersimavoq, taakkualu politiit kalerrissimavaat. Tamatumalu kingunitsianngua 27-nik ukiulik toqukkut qimaguppoq.
Toqunneqartup angutaa eqqartuussivimmut sassartinneqarami toqutsisimasutut pinngitsuunerarpoq eqqaamasaqannginnini pissutigalugu. Claus Risbjergip pineqartup eqqaamasannginneranut suna patsisaanersoq ilisimannginnerarpaa.
Toqusut timaanik misissuisartoq Danmarkimeersoq, kiisalu pinerluttoqarsimatillugu misissueqqissaartartut Nuummeersut Tasiilameersullu pisumik misissuinermi akulerutsinneqartut, politiit sapaammi ilisimatitsipput.