50-inik ukiulik Narsarsuup eqqaani ipilluni ajunaartoq

Narsarsuup eqqaani angut 50-inik umiatsiaaqqaminik ajutoornermi kingorna ipilluni ajunaarpoq. Politiit tusagassiuutinut nalunaarummi taama oqaluttuarput.

Angut ataasinngornermi ullaaralaakkut nalunaaqutaq 03.30 umiatsiaaqqamik ammaannartumik savaateqarfimmit Tasilummit Narsarsuup tungaanukarluni aallarpoq. Politiit aamma kajumissutsiminnik ujaaseqataasut angummik ujaasipput.

Telefonip attavia uumaneranik takutitsisoq kingulleq
Kujataani politiit Qaqortumi aamma Narsamit ujaasinermik aallartitsipput. Telemit paasissutissat naapertorlugit, angutip mobilia kingullermik Igalikup eqqaani qaqqami sakkortusaavik aqqutigalugu ullaakkut nalunaaqutaq 7.30 attaveqartoq paasineqarpoq.

Taamaattumik politiit innuttaasullu kajumissutsiminnik ujaasisut angallatinik Narsap Narsarsuullu akornanni ujaasipput. Tassunga atatillugu angutip pigisai arlaqartut nassaarineqarput, kiisalu umiatsiaaqqap ilaa Ipiutap kujataaniittoq.

Ipisimasoq nassaarineqartoq
Ataasinngornermi ujaasineq taarsimmat unitsinneqarpoq.

Ippassaq marlunngornermi ujaasineq nanginneqarpoq, tassanilu Issittup Sakkutooqarfia qulimiguulimmik Lynximik umiarsuarmit alapernaarsuummit Thetisimit ujaaseqataavoq.

Nalunaaqutaq 15.20 missaani ujarneqartoq toqungasoq nassaarineqarpoq. Oqartussat toqusumik misissuinerat tunngavigalugu paasineqarpoq, taanna ipilluni ajunaarsimasoq.

Umiatsiaaraq nassaarineqanngitsoq
Ajutoorneq sikuminermut apornerup kingunerisaanik pisimassasoq politiit ilimagaat, Kujataani politiit pisortarigallagaat, Laila Fleischer, taama oqaluttuarpoq. Angutip umiatsiaa suli nassaarineqanngilaq.

- Ujaasineq ajoraluartumik alianartumik naammassivoq, kisianni kajumissutsiminnik ujaasinermut ikiuuttorpassuit qujarutigaagut, Laila Fleischer oqartussat sinnerlugit taama oqarpoq.