Monday, August 21, 2017 - 14:50

2018-mut aningaasaqarnermut inatsisissatut siunnersuut sinneqartoorfiulaassaaq

Assi.: Leiff Josefsen
2018-mut aningaasaqarnermut inatsisissatut siunnersuut ullumi tusagassiortunik katersortitsinermi Aningaasaqarnermut Akileraartarnermullu Naalakkersuisumit Aqqaluaq B. Egedemit saqqummiunneqarpoq. Ukiulli tullianimut aningaasaqarnermut inatsimmi sinneqartoorfiulaassasoq ilimagaa.

"Patajaatsumik aningaasaqarneq naligiinnerunissamut tunngaviussaaq" qulequtaralugu Aqqaluaq B. Egedep tusagassiortunik katersorsitsinermi ukiup tullianimut aningaasaqarnermut inatsisissatut siunnersuummi suliniutit pingaarnerit saqqummiuppai.

Sinneqartuulaarneq

Ingerlatsinermut aningaasartuutitssatut 8,6 millionit koruunit missaanniissasut missingersuusiorneqarsimapput, 2017-mut sanilliunnerini affaat sinnerlugit ikileriaateqarsimapput, taamani 21,7 millionit koruuninut missingersuusiortoqarsimalluni.

Naak ukioq manna isersitakinnerunissaq naatsorsuutigineqaraluartoq aningaasarsiornikkut suli annertuumik siuariartorfiuvoq.

Isertitarineqartussanilu aatsitassarsiornermut takornariaqarnermullu tunngasut pitsaasumik ingerlasut oqaatigineqarpoq. Aammattaaq raajat qalerallillu akii pisarineqartullu ikileriaateqarsimangaluartut piffissami matumani ingerlalluarfiusut maluginiarneqarpoq. Akileraarutit akiitsulli nunatta karsiata millionilikkuutaanik isertitaqarfigissavai.

2030-mi 800 millionit koruuninik amigartoorneq

Inuiaqatigiit aningaasartuuteqarneruleriartuinnarnerat, aaqqissuusseqqinnerillu pisariallit iluarsiivigineqanngippata 2030-mi 800 millionit koruunit missaanni amigaartoorfiussasoq, Aqqaluaq B. Egedep nassuerutigaa

- Massakkut ingerlalluarnemi siumut isigaluni inunnut pitsaanerusumillu ataqatigiinnermut aaqqissuussinerit aningaasaaliffigineqartariaqartut, oqaatigineqarpoq, taakkuli ukununnga iluaqusiissapput:

  • Imminut pilersornerulerneq
  • Inuussutissarsiutitigut ineriartornerit suliffissanillu pilersitsinerit attatiinnarnissaat
  • Siunissami atugarissaarneq qulakkeerumallugu pisortat aningaasaqarneranik qajannaallisaaneq

Aaqqissuusseqqinnissamik suliniutit

Qajannaatsumik aningaasaqarnerup attatiinnarnissaanut aaqqissuusseqqinnermik suliniutinik aallartitsisoqassaaq taakkuli sisamanik qulequtalerneqarsimapput:

  • Ilinniartitseriaatsip pitsaassusaasa ilinniarsimassutsimulli qaffassutsip annertusarneqarnissaat
  • Siuariartornerup annertusarneqarnissaa aningaasarsiorfiusinnaasulli amerlisarneqarnissaat
  • Pisortaqarfimmik nutaanngorsaaneq
  • Atugarissaarnikkut sullississutit qularnaarneqarnerat aamma imminut pilersornerulerneq
Seneste nyheder / Nutaarsiassat kingulliit