tunisat pisiallu oqimaaqatigiinnerat

2016-imi avammut tunisat amerleriangaatsiartut

Avammut tunisat siorna 35 procentit sinnerlugit qaffariarput, tamatuma saniatigut pisiat appariaateqarput.

Raajanik avammut nioqquteqarneq 2016-imi ukiup siulianut sanilliullugu 404 millionit koruuninik qaffariaateqarfiuvoq

Tamanna tunisat pisiallu oqimaaqatigiinnerisa kisitsisaanni, Naatsorsueqqissaartarfiup saqqummiuteqqammisaani tamanna atuarneqarsinnaavoq. Pisiat avammut tunisanit suli amerlanerupput.

Avammut tunisat qaffariarneranni ingammik raajat aamma qalerallit avammut tunineqarnerat qaffariaateqarpoq, 404 millionit koruuninik aamma 318 millionit koruuninik qaffariaateqarput.

2016-imi avammut tunisanit isertitat 3.718 millionit koruuniusimapput, tamanna ukiup siulianut sanilliullugu 1 milliardinik qaffariarneruvoq.

Nioqqutissanik eqqussuineq 6,6 procentimik appariarsimavoq, aningaasartuutit 2016-imi 4.192 millionit koruuniusimallutik. Mineralit ikummatissallu avataaneersut annikillisimaneri appariarnermut pissutaanerpaasoq Naatsorsueqqissaartarfik ilisimatitsivoq.

Powered by Labrador CMS