2016-imi attartortut 203-t inigisaminnit anisitaasimapput

Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu naalakkersuisup Martha Lund Olsenip (S), Inatsisartunut ilaasortamut Bendt B. Kristiansenimut (IA) akissutaani tamanna takuneqarsinnaavoq.

Ukiuni kingullerni pingasuni attartortut anisitaasut 633-iusut akissummi aamma takuneqarsinnaavoq.

A/S Inissiaatileqatigiiffik INI ilisimatitsivoq, 2016-imi anisitsinerit 164-iusimasut, anisitsinernillu taakkunannga akiitsunik akilinngitsuugaqartut 152-iusimapput, 12-illu torersaannginnermik il.il. peqquteqarsimallutik.

Meeqqat isumagineqarnerat isiginiarneqartarpoq
Inissiaatileqatigiiffiit meeqqat isumagineqarnissaat isiginiartaraat, taamaattumillu attartortut anisitaaleraangata isumaginninnermi oqartussaasut suleqatigineqartartut, akissummi takuneqarsinnaavoq.

Inissiaatileqatigiiffik INI-mit kommunimi attartortup najugaani isumaginnittoqarfik attaveqarfigisarpaa.

- Attartortoq anisitaanissamik pinngitsoortitsisinnaasumik isumaginninnermi ikiorsiiffigineqarsinnaanersoq Isumaginnittoqarfiup naliliinissaa tamatumani siunertarineqarpoq, Bendt B. Kristiansenimut akissummi takuneqarsinnaavoq.

Attartortut ineqarnermut akiliisinnasimagaluarpat?
Taakku attartortut ineqarnerminnut akiliisimasinnaagaluarnerannut tunngatillugu, INI nalunaarusiamut 'Narsami anisitsisarnernut' tunngasumut innersuussivoq, tassani uppernarsarneqarpoq, attartortunit anisitaasunit arlalissuit akiliisinnaassuseqartut, ''taamaattumillu ineqarnermut akiliutinik akiliisinnaagaluartut uppernarsarneqarmat''.

Kommunini ataasiakkaani agguataarneqarnerat takuuk
2016-imi anisitsinerni kommunini ataasiakkaani ima agguataarneqarput:

• Kommune Kujalleq – 48

• Kommuneqarfik Sermersooq – 88

• Qeqqata Kommunia – 21

• Qaasuitsup Kommunia – 45