pilluaritsi
2014-imi Ukiumi Klassitut Pujortannginnerpaatut ajugaasut nunaqarfimmeersuupput
Upernaviup pigisaani nunaqarfimmi atuarfimmi klassit marluk ´ukiumi klassitut pujortannginnerpaatut´ajugaapput
Upernaviup kujataani nunaqarfimmi Kangersuatsiami 6. aamma 7. klassimi atuartut 2014-imi meeqqat atuarfiini akullerni atuartuni 'Klassitut Pujortannginnerpaatut' unamminermi ajugaapput.
Klassimi atuartut taamatut angusaqarnerminnut 30.000 koruuninik akissarsisinneqarput.
Taamatut paasissutissiivoq Peqqissutsinut Nunanilu Avannarlerni Suleqatigiinnermut Naalakkersuisoqarfik.
Kangersuatsiami 6.-7. klassimi atuartut ajugaanerannut tunngavilersuutigineqarput:
Pujortartarnerup ajoqutaanik ilisimasanik paasissutissiissutinillu imalimmik kakkersagaliortoqarsimavoq, atuartuinnaanngitsunut nunaqarfimmiunulli tamanut pujortartarunnaarnissamik kajungilersitsisinnaasumik.
Atuartut ilaat pujortarnermik misilittakkaminnik unneqqarissumik oqaluttuarput, siunnersuusiorlutillu meeqqat inuusuttullu pujortartalinnginnissaat qanoq isilluni oqaloqatigiissutigineqarsinnaasoq.
Ukioq 2014 pujortarnermik pinaveersaartitsilluni suliniuteqarfiusimavoq. Tamanna ukioq manna 2014-imi Klassitut Pujortarfiunnginnerpaatut unammisitsinermi malunnartinneqarsimavoq, tassa ukioq manna suliassiissutigineqarsimammat klassimuinnaanngitsoq atuarfimmulli tamarmut pujortartannginnissamik paasisitsiniaanissaq imaluunniit pisoqartitsinissaq.