2008-mi Nuummi ukioq mannamut sanilliullugu issinneruvoq

Sermitsiaq.AG-mi pingasunngornermi allaaserineqartutut Nuummi oqallisigineqarpoq ukiuni kingullerni 50-ini aatsaat taama ukiorlussiortoqartigisoq issilluni, anorersuartarluni apilluni, ilaatigullu aamma sapaatip akunnerini aqqanilinni atusuinnapajaamik sakkortuumik issilluni sila atugassaqartitsimmat.

Kisianni kisitsisit Asiameersut takutippaat ukiunik arfineq-marlunnik taamaallaat utimut qiviartariartugut qaammatini januarimi februarimilu ukioq mannamut sanilliullugu issinnerusimasunik takusaqarniarutta.

- Qaammatinut januarinut aamma februaarinut ukioq manna qaammatinut taakkununnga sanilliullugit issinnerusimasunik nassaarniarutta, taamaallaat 2008 tikillugu qiviartussaavugut, Asiami silap pissusaa pillugu suliaqartoq, Per Hangaard, Sermitsiaq.AG-mut taama allappoq.

2008 aamma 2015
Kisitsisimmi Asiameersut takutippaat 2008-mi januarimi Nuummi agguaqatigiisillugu 10,8 gradinik ississimasoq, ukioq manna agguaqatigiisillugu 10,3 gradinik issittoq. Taamatullu februar 2008-imi agguaqatigiisillugu 12,2 gradinik issittoq, ukioq manna 11,3 gradinik issippoq.

- DMI-ip allaaserisaanut sanilliullugu Asiap kisitsisaatai uani taasakka aallaaveqarput Asiap aamma DMI-ip Nuummi sumiiffinni assigiinngitsuni marlunni uuttuiveqarnerannik, kisianni DMI-ip 2008-mut kisitsisaatai aamma misissorpakka, taakkualu eqqartukkannit allaaneruvallaanngillat, Per Hangaard nassuiaavoq.

Atuaruk: Kalaallit Nunaanni silaannaap issinnera Danmarkimukariartuaartoq