biilernermut allagartaq
17-nik ukiullit biilernermik allagartartaarsinnaanerat kinguartinneqartoq
17-nik ukiullit biilernermut allagartartaarsinnaanerat qularnarpoq, tamannalu Danmarkimi misileraatitut ingerlanneqarpoq.
Danskit naalagaaffiata ukiuni pingasuni misileraallutik ingerlataannut Nunatsinni aamma atuutsinneqarsinnaanera, Demokraatit siulittaasuata Randi V. Evaldsenip, Naalakkersuisunut apeqquteqaatigaa.
Sukumiisumik paasinaasoqassaaq
Naalakkersuisut maannarpiaq nalunaarummut isummersorluarnissamut periarfissaqarsimanngitsut, Naalakkersuisunngorlaap Erik Jensenip akissuteqaammini paasissutissiaraa.
- Taamaattumik Naalakkersuisut misileraanissamut tapersiissanerlutik isumminnginneranni aallaqqaammut nalunaarummut tunuliaqutaasoq sukumiisumik misissorneqarpat naapertuutissasoq naliliisoqarpoq, Erik Jensen paragraf 37 naapertorlugu apeqqummut akissuteqaammini allapppoq.
Taassumali oqaatigaa pissutsit immikkut ittuunerat, soorlu attaveqaatit ilusii, biilernermut allagartartaarnissamut atuagarsornermullu misilitsinnissamut piumasaqaatit kiisalu atuutsitsilernissamut aningaasartuutit il.il. eqqarsaatigineqartariaqartut.
17-ninik ukiullit biilersinnaanerannut piumasaqaatit
Danmarkimi 17-nik ukiullit ukioq nutaami aallartittumiik biilernermut allagartartaarsinnaalersimapput. Biilissagaannilu minnerpaamik 30-nik ukiulimmik ilaqarnissaq aammalu ilagisaq minnerpaamik ukiuni qulini biilernermut allagartaqarsimanissaa arsaagaasimannginnissaalu piumasaqaataavoq.