politi
17-inik ukiulik imigassartorsimatilluni biilersimasoq tigummingallarneqalerpoq
Angut inuusuttoq 17-inik ukiulik ippassaq Sisimiut eqqartuussivianiit iperagaatinneqartoq, nunatta eqqartuussisuuneqarfiata aalajangiineratigut tigummigallarneqartussanngorpoq.
Sisimiuni Politiit 7. oktober nal. 0120-p missaani nalunaarfigineqarput Sisimiuni angut inuusuttoq 17-inik ukiulik imigassartorsimalluni biilersimasoq. Politiit tusagassiuutinut nalunaarummi paasissutissiipput.
- Sisimiuni Politiit erngertumik ornigupput biililu illoqarfiup aqquserngani ujalerlugu, biili pineqartoq takuneqarpoq politiillu biiliisa qullii tungujortut atorlugu unitseriarneqaraluarluni – ajoraluartumilli 17-inik ukiulik uninngilaq, stabschef Lars Kirkegaard allappoq.
Aamma atuaruk:
Sukkasoorujussuarmik biilertoq
17-inik ukiullip sapiisertumik aammalu soqqusaatsumik biilernini ingerlatiinnarpaa, politiillu arlaleriarlutik biilimik attaveqarnertik annaasarpaat, biililu taanna sukkasoorujussuarmik Sisimiuni aqqusinertigut assigiinngitsutigut ingerlavoq.
- Naggataatigut politiit biili Meeqqeriviup Ungaannguup silataani nassaarivaat, 17-inik ukiullip biili aqussinnaajunnaarsimagamiuk siornganik qullersuarmut aporsimasoq, taamaalilluni biili ikuallalerluni qatserisartunillu qaminneqartariaqarsimalluni. Tassunga tunngatillugu politiit paasivaat 17-inik ukiullip arnaq inuusuttoq aporsimagaa annertuumik aqqunartiterlugu, kingornatigut Nuummukaanneqartariaqarneranik kinguneqartumik, stabschef paasissutissiivoq
Inatsit tunngaviusoq naapertorlugu sassartinneqartoq
Ulloq taanna 17-inik ukiulik inatsit tunngaviusoq naapertorlugu killisiorneqarpoq piumasarineqarluni inis-siisarfimmiunngitsumi tigummigallagaanissaa – ilaatigut imigassartorsimalluni biilersimasutut, navialisitsi-simasutut aammalu mianersuaalliornikkut timikkut ajoqusiisimasutut pasineqarluni. Ulloq taanna kingusinnerusukkut Sisimiuni Eqqartuussiviup 17-inik ukiulik iperagaatippaa.
Aalajangiineq Unnerluussisussaatitaasut Nunatta Eqqartuussisuuneqarfianut aalajangeqqitassanngortippaa, ullorlu 8. oktober 2017 Sisimiuni Eqqartuussiviup aalajangiinera allanngortippaa, 17-inik ukiulik inissiisarfiunngitsumi tigummigallagaasussanngortillugu.
- Nunatta Eqqartuussisuuneqarfiata aalajangiinera innersuussutigalugu Sisimiuni politiit 17-inik ukiulik tigusareqqippaat. Isumaqarpugut pisoq annertuujusoq, ajornerusumillu pisoqarsinnaasimagaluartoq. 17-inik ukiullip navianaatilimmik biilernermi inuit arlallit aporpai, qujanartumillu ajoqusinngillat, stabschef Lars Kirkegaard oqarpoq nangillunilu:
Naammagisimaartoq
- Taamaattumik nunatta eqqartuussisuuneqarfiata aalajangiinera naammagisimaarpara, taanna unnerluussisussaatitaasunut isumaqataammat 17-inik ukiullip soqqusaappallaartumik iliuuseqarluni inatsisinik unioqqutitsisimanera tun-ngavigalugu inatsisini aalajangikkanik atortitsiniaaneq naapertorlugu tigummigallagaasariaqartoq, taama oqarpoq stabschef Lars Kirkegaard