takutitseqqaarneq

15-inik ukiullip maligassiuisunik filmiliorusunnini piviusunngortikkaa

Nunatsinni maligassiuisut ukkatarineqarnissaannut pikkorinngippallaartugut, Michelle Thårup Andersen isumaqarpoq. Tamannalu maanna iliuuseqarfigisimalerpaa.

15-inik ukiullip Michelle Thårup Andersenip inuusuttut aqqanillit apersorsimavai. Taakkulu qulingiluanngorlugit filmeeraliarisimavai.

Inuusuttut taakku aqqanillit timersornikkut imaluunniit eqqumiitsuliornikkut, imaluunniit nunani allani ilinniarnertik ataatsimoorussaraat. Taakkulu tamarmik cigaretsinut aanngajaarniutinullu 'naaggaartuupput'.

Michelle 12-nik ukioqarmat tamanna allartereerpoq, taassuma arnaa Margrethe Thårup Andersen Sermitsiaq.AG-mut oqaluttuarpoq.

Tassani niviarsiaqqap inuusuttuaqqap aasaanerani tammaarsimaartarnerit inuusuttunut timersornermik nuannarisalinnut aaqqissuunneqartartut maluginiarpai. Kisianni inuusuttuaqqanut namminertut ittunut, eqqumiitsuliornermik soqutigisalinnut soqanngilaq.

Nukissaqalersitsisumik takutitserusuttoq
Taava nammineq ujaasilerpoq, Nakuusamullu atatillugu peqataalerluni, kisianni tassani inuusuttut ajornartorsiuteqartut, atuarfimmi assigisaanillu ajornartorsiortut ukkatarineqarpallaarsorai.

- Taanna pitsaasumik takutitserusunneruvoq, nukissaqartitsisunik. Maligassiuisunik takutitserusuppoq, Margrethe Thårup Andersen nassuiaavoq.

Inuusuttut aperigaangata apeqqutit allaasartut
Arnaatalu Michelle tamatuminnga isumaqatigigamiuk, suliniummut aningaasaateqarfinnut qinnuteqarluni ikiuivoq. Namminersorlutik Oqartussat upernaaq suliniummut 'Piginnaasatta nukkassartarpaatigut'-mut aningaasaliissuteqarput.

Kingorna Michelle aamma Margrethe Thårup Andersen Nuummi maligassiuisunik Facebookikkut ujaasipput. Aqqanillillu 15-inik ukiullip apersorpai.

- Inuusuttup inuusuttoqatini aperigai malugineqarsinnaavoq. Apeqqutit allat uagut inersimasut apeqqutigiunnanngisagut apeqqutigai, anaanaq tulluusimaartoq oqarpoq.

Takuteqqaarneqassasoq
Filmiliat piareerneqaqqammerput, ippassarlu inuusuttunut apersorneqartunut angajoqqaavinullu takutinneqarput.

- Angajoqqaat ilaat meeqqami oqariartuutaat sakkortuut tulluusimaarutigalugit qullilipput.

Filmip saqqummiunneqarnerani Michelle Thårup Andersen tikilluaqqusivoq.

- Oqarpoq: 'Takorluugara piviusunngortitseqataaffigigassiuk qujanaq'.

Filmi tamanut ammasumik Qaqortumi katersugaasivimmi pingasunngornermi septembarip 20-anni takutinneqassaaq. Aningaasaqarneq ajunngippat, taava inuusuttunik maligassiuisunik illoqarfimmeersunik apersuisoqassaaq.

Kalaallit Nunaat tamakkerlugu filmip takuteqattaarnissaa aamma sumiiffinnit tamanit maligassiuisunik nutaanik apersuinissaq neriuutaavoq. Pilersaarut tamanna piviusunngortinnissaanut maanna aningaasassaqanngikkallarput. Kisianni Michelle Thårup Andersenip uppernarsereerpaa, uteriittuugaanni takorluukkat piviusunngortinneqarsinnaapput.

Powered by Labrador CMS