15-inik ukiulik maligassiusut pillugit filmiliamik iluatsitsisoq

15-inik ukiullip Michelle Thårup Andersenip Qaqortumi Katersugaasivimmut inuit isaasut tusaasinnaalereerpai. Inuit taakku inuusuttut aqqanillit maligassiuisut pillugit saqqummersitaanik takunnikkusullutik isaasut nipaat.

Matut ammarneqarmata ini sekundialuit ingerlanerini ulikkaarpoq. Taamaammat pissangakujulluni inimi ulikkaaqqasumi isiginnaariat tikilluaqquai.

- Pissangasorujussuuvunga, aallaqqaataani taamaammat nipera sajuppoq. Kisianni aallarteriarama pitsanngorpoq, taanna Sermitsiaq.AG-mut oqaluttuarpoq.

Aamma atuaruk: 15-inik ukiullip maligassiuisunik filmiliorusunnini piviusunngortikkaa

Inuusuttumit inuusuttunut
Isiginnaariat akornanni amerlsuut inuusuttuupput, Qaqortumilu Katersugaasivimmi napparsimasoqarnera pissutigalugu aamma inuusuttoq sulisoq aallarniummik oqaaseqartuuvoq.

- Taamaammat ammaanersiorneq inuusuttumit inuusuttunut ingerlanneqarpoq, taanna oqarpoq.

Suliniutaalu tassunga tunngassuteqarpoq. Taassuma inuusuttut allat aqqanillit Nuummeersut timersortartut, eqqumiitsuliorlutik suliaqartut imaluunniit nunanut allanut atuariartorsimasut apersorsimavai. Taakkulu aamma pujortartaratillu aanngajaarniutinik atuisuunngillat.

- Pitsaasunik tarrarsorfigisinnaasatsinnik pisariaqariaqartitsivugut, Michelle Thårup Andersen oqarpoq.

Immikkut pulaartoq
Qaqortumilu saqqummersitsinermi tamanna tigulluarneqarpoq, immaqa amigaataasimanera pissutigalugu.

- Naalakkersuinikkut suliaqartut amerlanerpaat ajortut oqaluuserineqarusarpaat, atukkallu qanoq pitsanngortissinnaanerlugit naammaginanngitsumik sammisarlugit. Taamaammat maligassiuisut pitsaasunik oqariartuutaannik saqqummiussinissaq pingaaruteqarpoq.

Saqqummersitsinermi maligassiuisut taakku aqqanillit plakatinngortinneqarsimapput, oqariartuutaallu eqqaanni takusassiarineqarlutik. Videolu aallakaatinneqarluni.

Saqqummersitsisoqarnerani pulaartoq immikkuullarissoq iserpoq. Eqqumiitsuliortoq ilisimalluarneqartoq Aka Høegh, Michellep videoliornerani saqqummersitsineranilu pilluaqqusiartortoq.

- Tulluusimaarutigalunga oqarpoq, suliniullu isumassarsiorfiulluarnerarpaa.

Nunat angalaarfiginiaraa
Saqqummersitsineq aamma videoliaq oktobarip 22-ata tungaanut Qaqortup Katersugaasiviani takuneqarsinnaavoq. Marsimi Nuummi takutinneqassaaq. Tassanilu piffissami maligassiuisut amerlanerusut ilanngussimassapput.

- Inuusuttut sinerissameersut takutikkusuppakka, Michelle oqarpoq.

Saqqummersitsinerup nunap sinnerani takutinneqaqattaarnerani suliniutip ineriartortinneqarnissaa taamaalilluni pilersaarutaavoq. Paamiuni aamma Tasiilami saqqummersitsinissat pilersaarusiorneqalereerput.

Michellep inuusuttunik apersuinermini pisuunnguallattutut misigaaq.

- Tusarnaarlugit ilikkagaqartorujussuuvunga, oqaluttuaallu eqqarsaatigisarlugit.

Taamaammat aamma suli siammarterineruniarpoq. Taanna anaananilu Margrethe Thårup Andersenilu KNR-imut saaffiginnissimapput filmit takutikkusullugit. Taakkulu qanoq aamma qaqugu inuit attaveqatigiittarfiisigut saqqummiunniarlugit isumaliutersuutigaat.