Ilimanaq
12-nik ukiulik isilluni annaqqartoq
Qaasuitsumi politiit meeqqat annanniutilertarnissaat inassutigaat, sapaatip akunnerata naanerani nukappiaqqap Ilimanap kujataani ajunaangajannerata kingorna
Ilulissani Qaasuitsup politiivi arfininngormat nalunaaqutaq 23.22 nalunaarfigineqarput nunaqarfiup Ilimanap kujataani Agpat eqqaanni Pinnguarsummi nukappiaraq 12-nik ukiulik gummibådimit imaanut nakkarsimasoq.
Politiit paasitinneqaerput inuit tamaaniittut nukappiaraq ikiorsinnaasimanngikkaat, nunamiikkamik.
Annanniuteqanngilaq
Nukappiaraq annanniuteqarsimanngilaq, gummibådimullu najummatsersimaannarluni qaqisinnaanani.
Inuit tamaaniittut angallatertik kisariarlugu gummibådi nunamut ikaarutigisimavaat.
Arlallit nalullutik nukappiaraq ikiorniarsimagaluarpaat, imarli nillerpallaaqimmat tikissinnaanagu.
Arlallit annaassiniaqataapput
Ilimanami kommunefogedi attaveqarfigineqarpoq, taannalu ingerlaannavik orniguppoq. Aasiaat Radioatigut PAN-PAN-imik kalerrisaarisoqarpoq, arlallillu nalunaarput tassunga ornigunniarlutik.
Nalunaaqutaq 23.47 nukappiaraq imaanit qaqinneqarpoq Ilulissanilu napparsimmaviliaanneqarluni, tassani unitsinneqarluni timaa nillerpallaalersimammat isikkamigullu ajoqusersimalluni.
Ataasinngormat nukappiaraq qujanartumik angerlartinneqarpoq, taamatullu atugaqarsimagaluarluni ajorani, Qaasuitsup Politiivi nalunaaerput.
Mianersornerullusi
Politiit sakkortuumik kajumissaarutigaat meeqqat imaani angalatillugit tamatigut annanniuteqartinneqartassasut, meeqqallu kisimiilutik inersimasumik ilaqaratik angalasassanngitsut.
Politiillu nukappiaqqamik annaassiniaqataasut qutsavigaat.