Imigassanut inatsit
1. Marts 2018 aallarnerfigalugu imigassat aalakoornartortallit assiaqusersorneqalissapput
Imigassanut inatsit 1. marts 2018 atuutilissaaq, tamatuma kingorna inatsimmi aalajangersakkat malinneqalissasut, Namminersorlutik Oqartussat paasissutissiipput
Sermitsiaq aviisi kingullermi saqqummertumi allaaseraa, immiaaqqanik, viinninik imigassanillu nakuusunik pisiniarfinni assiaqusersuineq aatsaat 1. januar 2019 atuutilissasoq, tamatumunnga pissutaavoq Avannaani Tunumilu pisiniarfiit martsip qaammataa nallertinnagu assiaqusersuinissamut atungassanik pissarsinnaanngimmata.
Tamannalu eqqunngitsoq, Namminersorlutik Oqartussat erseqqissaapput.
- Inatsisartut inatsisaat 1. Marts 2018 atuutilissaaq, tamatumalu kingorna inatsimmi aalajangersakkat malinneqassallutik. Tassa imaappoq pisiniarfinni imigassamik assersuinissamut piumasaqaat 1. Marts 2018 aallarnerfigalugu atuutilissaaq, Namminersorlutik Oqartussat tusagassiuutinut nalunaarummi allapput.
Atuaruk: Assiaqusersuinissaq ukiortaamut kinguartinneqartoq
Nalunaarusiami februar aappaanut tusarniaavigineqartumut Naalakkersuisut pisiniarfiit imigassanik aalakoornartortalinnik qanoq assiaqusersuinissaanut sukumiinerusumik piumasaqaateqarput. Nalunaarusiaq tamanna 1. 2019-mi atuutilissaaq, taassuma kingorna nalunaarusiami piumasaqaatit pisiniarfiit eqquutitissavaat.
- Nalunaarusiap atuutilersinneqarnera 1. januar 2019-mut aalajangiunneqarpoq, taamaasilluni pisiniarfiit tamarmik nalunaarusiami assiaqusersuinermut imigassallu aalakoornartortallit inissisimaffissaannut nalunaarusiami piumasaqaatit piareersarnissaanut piffissaqarluarniassammata, Namminersorlutik Oqartussat nalunaaruteqarput.
Inatsisip 1. Marts 2018-mi atuutilerfianiit nalunaarusiallu 1. Januar 2019-mi atuutilernissaata tungaanut pisiniarfiit namminneq aalajangissavaat imigassat qanoq assiaqusersornissaanut taamaasillutik pisinianut takussaanngitsuutillugit.