AALISARNEQ
Saarullinnik uumatitsiveqarneq pillugu inatsisiliortoqassaaq
Inatsisartuni ilaasortaq, Siverth K. Heilmann (A) siunnersuuteqarpoq Royal Greenland suleqatigalugu saarullinnik uumatitsivinnik amerlanerusunik pilersitsisoqarnissaanik pilersaarusiortoqarnissaanik Naalakkersuisut peqquneqassasut. Namminersortulli maanna aalisariaatsimut taamaattumut periarfissinneqarusupput. Taamaattumik Naalakkersuisut siunnersuutigaat saarullinnut uumatitsiviit atornerinut tunngavissat iluarsiiffigineqarnerata nalunaarutinut attuumassuteqartunut ilanngunneqassasut.
Annonse
2014-miilli Royal Greenland saarullinnik uumatitsiveqarneq aallaavigalugu aalisakkanik taakkuninnga niuernikkut ineriartortitsinermik ingerlatsivoq. Maanna ingerlatseqatigiiffiit allat Naalakkersuisunut qinnuteqartalersimapput taamatut aalisariaatsimik ingerlatsinissaminnut.
Inatsisartuni ilaasortamut Siverth K. Heilmann (A)-mut, Royal Greenland suleqatigalugu saarullinnik uumatitsivinnik amerlanerusunik pilersitsisoqarnissaanik pilersaarusiortoqarnissaanik Naalakkersuisut peqquneqarnissaannik siunnersuuteqartumut Aalisarnermut Piniarnermullu Naalakkersuisup, Kim Kielsenip (S), akissuteqarnermini tamanna ersersippaa.
- Suliniummut Nutaamut atatillugu aalisakkanik uumatitsiviit atorneqarnerat 2016-miit aalisartut 50-t missaannit 2023-mi aalisartut 120-t missaannut amerlassuseqalersimapput. 2024-mi uumatitsiviit amerlassusaasa qaffaqqinnissaat naatsorsuutigineqarpoq.
- Tamatuma saniatigut ingerlatsisumit Royal Greenlandip saarullinnut uumatitsiviit ingerlataasa assinginik aallartitserusulluni kissaateqartumit 2023-mi saaffiginnissummik Aalisarnermut Piniarnermullu Naalakkersuisoqarfik tigusaqarsimavoq, Kielsenip Heilmannimut akissutaani ilaatigut oqaatigineqarpoq.
Suliassaqarfimmi inatsisit amigaataapput
Aalisarnermut Piniarnermullu Naalakkersuisoq aamma akissuteqaammini ilisimatitsivoq aalisartut kattuffiinit aalisarnermut piniarnermullu naalakkersuisoqarfik apuussivigineqartarsimasoq saarullinnik uumatitsiveqarnermik atuineq annertusiartormat inatsisiliornissamik kissaateqartoqartoq.
- Inuussutissarsiutigalugu aalisartut saarullinnut uumatitsivinnik atuisut amerlassusaasa ineriartornerat, tunisinerup taamatut ilusillip ineriartorteqqinnissaanut soqutiginninnerujartorneq taassumalu aaqqiiffigineqarnissaanik kissaateqarneq tunngavigalugu, allannguutissatut siunnersuummik tunniussissaanga. Neriuppunga allannguutissatut siunnersuut taanna ammasumik soqutiginnittumillu tigujumaarissi, allannguummut siunnersuummi tassani sinaakkutit siammasinnerusut pilersissavagut, saarullinnut uumatitsivinnik atuinerup ingerlatsisunut amerlanerusunut ammaassimmat.
Saarullinnik uumatitsivinni toqorartoqarneraasarneq uppernarsarniarneqarpoq
Pingaartumik KNAPK Royal Greenlandimut saarullinnik uumatitsivimmiittunik toqorartoqartarneraalluni arlaleriarluni isornartorsiorpoq. Kisianni tamanna pisortatigoortumik nalunaarutigineqartarsimanngitsoq, Kielsen akissuteqaammini erseqqissaavoq:
- Aalisakkat toqangasut pillugit siusinnerusukkut paasissutissiisoqartarsimavoq, kisianni toqqaannartumik KANUAANA-mut saaffiginnittoqanngilaq imaluunniit taakkunannga nalunaarsuisoqanngilaq. Saarulliit toqungasut amerlasussaannik nalunaarsuineq uppernarsarniarlugu uumasut avalatseqqinneqartut kiisalu bundgarninik imaluunniit uumatitsivinni saarulliit toqusut amerlassusaat nalunaarsorlugit uppernarsarneqarnissaat 2024-mi piffissaq ilanngullugu KANUAANA-p kissaatigisimavaa.
