Polar Seafoodip nipisat suaannik nutaanik avammut tunisisarnini nangippaa

Nipisat suaat nutaat danskit atuisut akornanni piumaneqarluartuupput. Suaat piumaneqartut amerlanerpaartaat Islandimeersuupput, tassami ukioq manna aamma nipisat pisarineqartut nalinginnaanngitsumik amerlanngimmata, danskit suaataannik pisiassaqarpallaanngilaq.

Sapaatip akunnerani matumani Polar Seafoodip nipisat suaannik nutaanik nunatsinneersunik Air Greenland aqqutigalugu Danmarkimut timmisartumik assartuineq aallartippaa. Usit Nuummiit Kangerlussuarmut Dash-8-mik assartorneqartarput, tassanngaanniillu Airbus 330neomik Kastrupip mittarfianut ingerlateqqinneqartarlutik.

Blue Water Shippingip Polar Seafoodip pisisartuanut, nioqqutinik amerlasuunik tunisaqartartorsuaq, suannik nunatsinneersunik pisisartuminut siammarterisartoq.

Nunatsinni mittarfissuassat periarfissarititaasa atorluarnissaannut piareersimanissaq siunertaralugu niuerfimmut iserniarluni, ingerlatseqatigiiffik Danmarkimut nipisat suaannik nutaanik avammut niuernini aallartissimagaa, Polar Seafoodimi pisortaaneq Miki Brøns oqarpoq.

Nuummi mittarfik nutaaq ukioq manna novembarimi ammassaaq, Ilulissani mittarfik nutaaq siusinnerpaamik 2025-imi ammarnissaa naatsorsuutigineqartoq.

Nipisat suaat nunatsinneersut danskit pisisartut ukioq manna qanoq tigussaneraat, Polar Seafoodimi pissanngatigineqarpoq.

- Piffissaq ungasinnerusoq eqqarsaatigalugu tonsinik marlunnik kisitsisitalinnik ukiumut tunisaqartarnissarput neriuutigaarput, kisianni periarfissat aamma piumaneqarnerat apeqqutaajuaannarpoq, Miki Brøns oqarpoq.

Nunatsinni nipisat suaannik niuerfimmi pisisussaqarnersoq paasiniarlugu, ingerlatseqatigiiffik siorna siullermeerluni timmisartukkut nutaanik Danmarkimut nassiussilluni misiliivoq.

- Naatsorsuutit ilaatigut naapertuupput, kisianni kingusinaarluta aallartippugut, pisortaaneq oqarpoq.

Nioqqutissanik timmisartukkut avammut tunisisarneq siunissami ukiorpassuarni Polar Seafoodimit immikkut tunisassiarineqartassasut, Miki Brøns isumaqarpoq. Ingerlatseqatigiiffik sapaatip akunnerani matumani nipisat suaannik 1.200 kiilunik Danmarkimut timmisartumik nassiussipput.

Ukioq manna Danmarkimut tonsinik qanoq amerlatigisunik nassiussinissarsi naatsorsuutigaasiuk?

- Piumaneqarnerat apeqqutaassaaq, pisortaaneq oqarpoq.

Islandimit suaat

Danskit aalisakkanik niuerfiini nipisat suaat tunineqartut tamarmiusut 90 procentii Islandimit timmisartumik tikisinneqartarput, Klaus Anker Jensen, peqatigiiffimmi Danske Fiskehandleremi siulittaasoq oqaluttuarpoq.

Klaus Anker Jensenip niuerfik ”Fisk er godt” Hjørringimi ingerlappaa.

- Periarfissanut tamanut ammavugut, aamma Kalaallit Nunaannit nipisat suaannut. Niuerfimmi pisut soqutiginarput.

- Nipisat suaat avataaneersut tamarmik tikilluaqqusaapput. Kisianni nunanit allanit pissarsiatta amerliartuinnarneranni akit tatineqarnissaat ernumassutigaara. Islandimit nipisat suaasa akikinnerulernerannik kinguneqarsinnaavoq, taamaalillunilu nerisassani pitsaalluinnartuni nalinginnaajunnaarlutik, nioqqutissallu puulukip neqaatut siatassatut assersuunneqarsinnaalernissaat. Taamaalilluta Islandimi aalisartut nipisanniarumajunnaaratarsinnaapput, taanna oqarpoq.

Kiilumut 350-500 koruunit

Aalisakkanik niuertoqarfiit sapaatip akunnerani matumani nipisat suaannik Islandimeersunik, kiilumut 350 aamma 500 koruunit akornannik akilerlugit tuniniaanissaat, Klaus Anker Jensenip Danske Fiskehandleremeersup naatsorsuutigaa.

- Akit taama qaffasitsiginerat Sjællandimi taamaallaat pisarpoq. Nipisat suaat 2.500 koruuninik akilerlugit tuniniaasinnaanngilanga. Jyllandimiut suannik taamatut akilinnik nerisaqartanngillat, taanna oqarpoq.

Islandimit eqqussuineq ukiumut nalinginnaasumik 100 tonsiusartoq, taanna oqarpoq.

- Maannamut Islandimit nipisat suaannik 50-60 tonsinik pissarsereerpugut, Klaus Anker Jensen oqarpoq.