Nammineq pisassarisat Naalakkersuisut amerlivaat
Naalakkersuisut aalisarnermut inatsisissatut siunnersuut aallaqqaammut siunnersuutigineqartoq pingaarutillit ilaanni allanngortissimavaat aatsaat taama amerlatigisunik tusarniaanermi akissuteqartoqartigimmat. Tamannali kikkut tamarmik naammagisimaassagaat ilimananngilaq.
Annonse
Aalisarnermut inatsisissatut siunnersuutip inaarutaasumik suliarineqarnerani inuttut ataasiakkaatut pisassiissutit 10 procentimiit 12,5 procentimut qaffanneqarput. Ilanngullugu nuunniarnermut piffissaliussaq sivitsorneqarpoq, suliffeqarfiit nunanit allaneersut ukiut qulit ingerlaneranni nunatsinni pigineqartumut 100 procentimik nuunnissaannut piffissalerneqarlutik.
Aalisarnermut inatsisissatut siunnersuummi nutaami aaqqitani arlaqartuni marluk taakku ilaaginnarput, tassani Naalakkersuisut siunnersuummut 2023-p naanerani tusarniaassutigineqartumut sanilliullugu naleqqussaasimammata.
Grønlandsbanken tusarniaanermut akissummini tikkuaavoq piginnittoq 10 procentinik piginneqataasinnaanera killilerneqarpat aamma qanigisat qanoq paasineqassanersut nassuiarneqartariaqartoq, „pissarsiassanik piginneqataassusermillu tuniniaanissaq pisariaqarluinnalissammat“.
- Tamanna ajornartorsiutaassaaq, tassa, GrønlandsBankenip isumaa malillugu, pisinerup aningaasalersornissaanut aningaasaqarnikkut tunuliaqutaqartumik Kalaallit Nunaanni aningaasaliisoqarsinnaanngimmat, aningaaserivik allappoq.
Naalakkersuisut naatsukullammik allapput:
- Tusarniaanermi akissutit tiguneqartut tunuliaqutaralugit inummut pisassiissutinut qummut killiliussat 10 %-imiit 12,5 %-imut qaffanneqarput.
Naalakkersuisut itisiliipput piginnittuussutsip kisermaassineruleriartornerata killilersimaarnissaa pingaarnertut suliassaasimasoq.
- Piginnittut akornanni qanigiissuseq piginnittuunermik siammarterivinnermut sanilliullugu oqallisigineqarsinnaavoq. Naalakkersuisut killissaq siunnersuutigineqartoq toqqarsimavaat ima eqqarsarlutik, siammarterineq ilaquttanit qanigisanit pissasoq, kiisalu ima eqqarsarlutik, ilaqutariit qummut ammullu kiisalu qatanngutit tassaassasut ”ilaquttat qanigisat”, Naalakkersuisut allapput.
Nunanit allanit aningaasaliissutit
Aalisarnermut inatsisissatut siunnersuutigineqaqqaarneranit nunanit allanit aningaasaliiffigineqarsinnaaneranut tunngatillugu siunnersuummut Naalakkersuisut aamma naleqqussapput.
- Naalakkersuisut eqqarsaatigeqqissaarsimavaat aningaasaliisartut nunanit allaneersut Kalaallit Nunaanni aalisarnermi qanoq annertutigisumik piginnittuusinnaassanersut isumaqarpullu nunatsinni aalisarneq kalaallinit pigineqassasoq. Taamaakkaluartoq tusarniaanermut akissutit nassiunneqartut aallaavigalugit ingerlatseqatigiiffiit nunanit allaneersunit pigineqartut ikaarsaarnissaannut piffissaat ukiunik tallimanik ilaneqarput, taamaalillutillu ingerlatseqatigiiffiit nunanit allaneersunit pigineqartut kalaallinit 100%-imik pigineqalernissaannut ukiunik qulinik piffissaliisoqarpoq. Nunanit allanit piginnittoqarsinnaaneq pillugu immikkut akuersissuteqarnissaq suli periarfissaavoq, siunnersuummi§ 11, imm. 2 takuuk, allassimavoq.
Aammattaaq Naalakkersuisut erseqqissarpaat nunani allani soraarnerussutisiaqalernissamut aningaasaateqarfiit Kalaallit Nunaanni immikkoortortaqarfiliorsinnaallutik aalisarnermut aningaasaliisinnaasut.
Aalisarnermut inatsisissatut siunnersuut apriilip aqqarnani Inatsisartuni siullermeerneqassaaq.
