Kukkukuut aallaqqaataanilli imminnut isumagisarput

Kukkukuut nunarsuaq tamakkerlugu nerineqarnerpaanut ilaapput. 

Upperisarsiortut kulturillu timmissanik nerisaqartarneq tamangajavimmik pisinnaatippaat. Kalaallit Nunaannilu aamma taamaappoq, ingammik Nuummi, pisiniarfissuit kukkukuunik aamasunik tuniniaaffigisartagaanni. Taamattaarlu aamma neriniartarfiit amerlanerit kukkukuunik sassaalliuteqartarput, minnerunngitsumik illoqarfiit pingaarnerisaanni Jyllandimiut qalagasuartarfiutaanni ”Kylling&Co.”-mi 

Amerlagunanngilagulli nammineq kukkukuutugassatsinnik kukkukuujuteqarnissamik isumaliuteqarsimasut. 

Piviusunngortinnissaali ajornartorsuunngilaq, Peter Ehmsen, maanna ukiup aappassaani quimi kaniinat inaanni kukkukuuaqqanik uumasuuteqartoq oqaluttuarpoq.

- Ullormit siullermit imminnut paarisuupput. Imerfik qanoq atorneqartartoq takutiinnarneqartussaavoq, taama sinnerisa issuartarpaat. Anaanaqarnissartik pisariaqartinngilaat, Peter Ehmsen oqarpoq, qullillu kialaartitsisut kiisalu inaasa naqqisa ullut tamaasa salillugulu allarterlugulu anaajartarnissaa pisariaqartoq nassuiaatigaa, taamaattoqanngippammi sukkasuumik annertusiartupiloortarput, sunngiffimmini kukkukuujutilik nassuiaavoq:

- Iperterinikkaapilussuupput!

Kukkukuujuteqarnissamut isumassarsiaq ikinngutaata neriniartarfiutillip Mads Bekip, Nuummi ukiuunerani neriniartarfimmik Unicornimik aasaaneranilu kangerlummi hotelimik Qooqqut Nuannimik ingerlatsisup isumassarsiaraa, taassumali savaateqarnissaq kukkukuujuteqarnissarlu, immaqalu taqqamani puulukiuteqarnissaq nuannerunartitaraa. 

KIngorna Peter Ehmsenip ukiualunni isumassarsiaq isumaliutigerusaarpaa, siornalu piviusunngortillugu manninnik tukertitsivimmik pisivoq. Kammalaataata kukkukuut mannii Danmarkimit Nuummut nassarpai. Manniit tukertitsivimmut ikineqarput, sapaatillu akunneri pingasut qaangiuttut manninnit 20-nit kukkukuuaqqat 13-t tukerput. 

Uumasuutitaat kingorna ilaqutariit quianni sapaatit akunneri arfinillit arfineq marluk missaanneeriarlutik Qooqqunukaanneqarput, Mads Bekillu piffissap ingerlanerani piginnittuusimasut kukkuusiviat iluarsartuussimavaa. Kukkukuut kukkukuut nerisassaannik igaffimmillu sinnernik nerukkarneqartarput. 

Kukkukuut nammineq tukertitat inuussutissarsiutigineqarsinnaanngillat. Aasaaneralu naammat ilaqutariit nammineq nerisassaatut toqorarneqarput. 

- Pisiniarfiit nillataartitsiviinit kukkukuuaqqanit allaanerulluinnarput, ilumorluinnaq. Neqqarinneroqaat, Peter Ehmsen oqarpoq.

Uerisoq

Ukioq mannalu kukkukuunik suliniutaa allivoq. 

Peter Ehmsen ataasiaannarluni tukertitsinani, marloriarluni tukertitsiniarpoq. Manninnit 20-nit tukertut 14-it maanna ilaqutariit quianni kaniinat inaanni marlunniipput, tukertussallu tullii maanna tukertitsivimmi kialaartinneqarput.

Kukkukuut kukkukuuaqqatut nerisassaallutilluunniit manniliortussaapput. Kukkukuut Piitap manniliortitassarai, immaqalu ukioq manna mannileriissapput, tukereernikuuppummi. Siorna aatsaat maajimi tukerput. 

Kukkukuuaqqat nuannaarutaalluartuupput. Isiginnaarneri nuannerput, allalli kukkukuuaqqanik nuannarinninnerat aamma taama nuannertigaaq.

- Inuit, tassani meeqqat ilanngullutik, aqqusaarlutik kukkukuuaqqanik alliartortunik allisunillu isiginnaartarnerat soqutiginartupilussuuvoq, Peter Ehmsen oqarpoq, Taannalu Jyllandip kujataani nunaannarmi allartorsimavoq.

- Taamanikkut kukkukuujuteqarpugut, maannakkutulli taamak qanitsiginikuunngilakka, taanna oqaluttuarpoq. Nuummi siusinnerusukkut kukkukooqarluni, savaqarluni hiistiuteqartoqartarsimasoq taanna oqarpoq. Tamannali ukiorpaaluit matuma siorna pivoq, immaqalu tamanna patsisigalugu kukkukuut uumasuunatik pisiniarfiit qerititsivianniittutut isumaqartoqarpoq. 

Qanorluunniillu pisoqartillugu attaveqarfigisaani amerlasuut meeqqatik ernuttatillu nassarlugit kukkukuut qanoq alliartornerat takusassallugu nuannareqaat. 

- Meeqqat tupigusuttaqaat, ilaasali ersigilaartarpaat, allalli quperlunik panertitanik nerukkarnissaat ajornartorsiutigineq ajorpaat, Peter Ehmsen oqaluttuarpoq. 

Upernaaq manna kingusinnerusukkut aput aappat ivikkallu inneruulallu naappata kukkukuut qaqqaliaanneqassapput, kingornalu siorna tukertitat assigalugit Qooqqut Nuannimukaanneqassapput.

Taamaattoq ukioq manna tukertut ilaat Qooqqunukaanneqassanngillat, taakku uninngaannassapput Piitallu sakiani, ukioq manna inuuissiornermini kukkuusivimmik tunissutisisumi manniliortinneqassapput. 

Kukkuut sapaatit akunnerinik 20-nik pisoqaatigileraangamik mannilisinnaalersarput, ukiualunnilu manniliortarput. Kukkukuut sorliunerat apeqqutaalluni ukiumut 200-t angullugit manniliorsinnaapput, ilaallu ullut tamaasa manniliortarput. 

Kukkukuut manniliortussat ataasiakkaat eqqaassanngikkaanni Peter Ehmsenip kukkukuujutai amerlaneranit – siorna tukertitat assigalugit – aasaq naappat toqorarneqassapput. 

Aamma kukkukuut isiginnaarlugit qanoq inequnartigigaluarpataluunniit, ilaallu immaqa ateruseqalersimagaluarpataluunniit, taamanikkornissaanut piginnittoq ulimaammik tiguseriarluni niaquiiartornissaanut killitsissinnaaneranut sunnguamilluunniit takussutissaqanngilaq.

- Qimmitullumi qitsuttulluunniit toqoriarlugu iliartorneqartussaanngillat, Peter Ehmsen oqarpoq, taassumalu kukkukuut nerisassatut tukertinneqartarnerat erseqqissaatigaa.