Kangaamiuni qeqqussat inuussutissarsiornermut iluaqutaassasut

Kangaamiuni qeqqussanik tunisassiorfimmik pilersitsinissaq siunertaralugu innuttaasut sulissuteqarput – taassuma saniatigut tuttut umimmaallu neqaannik kiisalu aalisakkat nerpiinik panertiterinissaq aamma pilersaarutaavoq. Suliniut nunaqarfimmi inuussutissarsiornikkut ineriortornermut pitsaasumik kinguneqarumaartoq, suleqatigiiffimmi siulittaasoq Jens M. Lyberth oqarpoq.

Taanna aamma Kangaamiuni aalisartut piniartullu peqatigiiffianni siulittaasuuvoq nunaqarfimmilu aqutsisuni ilaasortalluni.

Royal Greenlandip Maniitsup eqqaani qeqqussanik naatitsinermik misileraaviani qeqqussat junimi 30 tonsit missaaat katersorneqarnissaat naatsorsuutigaat. Qeqqussanillu nioqqutissiulernissamut periarfissarissaartoq, misileraanermik ingerlatsisoq Nikoline Zeimer isumaqarpoq.

Aammattaaq Pinngortitaleriffik ukiuni arlalinngortuni qeqqussanik naatitsinermik misileraavoq, tamannalu pillugu ilisimatuussutsikkut paasisanik katersuilluni.

Qeqqussat nunarsuarmi piumaneqarnerat annertusiartorpoq, qeqqussallu nunatta sineriaani naatinneqarluarsinnaasut, Pinngortitaleriffiup qeqqussanik misileraalluni naatitsineq pillugu 2021-mi nalunaarusiaani erserpoq.

Aningaasarsiorfiusinnaasut nutaat

2019-imi Naalakkersuisut qeqqussat pillugit Nuummi saqqummiinerisa kingorna, Kangaamiuni aalisartut piniartullu peqatigiiffiata suliniuteqarneratigut, nunaqarfimmi qeqqussanik tunisassiulersinnaaneq pillugu suliaq aallartinneqarpoq, kingornalu najugarisami suleqatigiissitaq pilersinneqarluni.

Suliaq covid-19-ip 2020-imi tuniluunnerata nalaani uninngatinneqareerluni suleqatigiiffik siorna aallartinneqqinneqarpoq.

Aallarnisaasunut siunnersuisarfik Arctic Circel Business suleqatigiissitamut siunnersortaavoq, maannakkuugallartumullu Kangaamiuni nukissiorfikoq isaterteriarlugu nutaamik illutalerlugu qeqqussanik, neqinik aalisakkallu nerpiinik panertiterivissatut piukkunneqartoq, suleqatigiiffimmi siulittaasoq Jens M. Lyberth oqarpoq.

– Nunatsinni nunattalu avataani qeqqussat piumaneqarluartut ilisimavarput, Kangaamiunilu tunisassiarineqarsinnaalernissaat aalisartut piniartullu peqatigiiffiata, nunaqarfimmi aqutsisut innuttaasullu kissatigaat.

– Tuttut, umimmaat saarulliillu panertitat ukiarnerani nunatta sinneraniit Kangaamiunut piniarneqartarnerat annertuvoq, taamaattumik qeqqussanik panertiterivik taakkunannga aamma panertiteriviuttut atorneqarsinnaanissaa eqqarsaataavoq.

Taamaaliornikkut nunaqarfimmi aalisartut pinniartullu aningaasarsiorfigisinnaasaat maannakkorniit annertunerulernissaat siunertaavoq, taanna oqarpoq.

Kangaamiuni nunaqarfimmi aqutsisut qaammammut ataasiarlutik ataatsimiititsisarput, suliniullu soqutigineqarluartoq suliffeqarfillu pilersinneqarpat innuttaasut piumasut piginneqataasinnaanissaat suliniuteqartut pingaartippaat.

Royal Greenland aningaasaliisoq

Siunissami tunisassiulersinnaaneq siunertaralugu Royal Greenland qeqqussanik naatitsivimmik immikkuullarissumik Maniitsup avataani pilersitsinikuuvoq, Royal Greenlandimi Business Development Manager Nikoline Ziemer naapertorlugu, Kalaallit Nunaata qeqqussanik nunanut allanut niueruteqalernissaanut periarfissarissarissaarpoq.

– Qeqqussat immami nammineq naanikut katersorneq ajorpagut namminerlu naatittarlutigit. Qeqqussat naalluartarput, taamaattumik qeqqussanik iluatsilluartumik nunanut allanut niueruteqalernissaanissaq upperaara, taanna oqarpoq.

Royal Greenlandip qeqqussanik tunisassiornermi piginnaasat annertusarniarlugit Nordisk Tang 2020-ip aallartinnerani suleqatigilerpaa, siornalu junip aallaqqaataa aallarnerfigalugu Danmarkimi suliffeqarfimmi qeqqussanik tunisassiornermik ingerlataqartumi Nordic Marine Nutrition-imi piginneqataassutit annersaat Royal Greenlandip pisariai.

Ilisimatuussutsikkut ilisimasat

Pinngortitaleriffiup qeqqussanik misileraalluni naatitsineq pillugu 2021-mi nalunaarusiaa naapertorlugu. Qeqqussat nunarsuarmi piumaneqarnerat alliartoraluartoq qeqqussat Kalaallit Nunaaneersut suli maannamut atorluarneqanngillat.

Pinngortitaleriffik Nuup eqqaani misileraalluni qeqqussanik assigiinngitsunik marlunnik, tassa sulluitsoq (vingetang) aammalu uisuk (sukkertangsart) siusinnerusukkut naatitsisarpoq, qeqqussallu allunaasani qassutaasaniluunniit naatinneqartarput.

Naalakkersuisut siusinnerusut nalunaarutigereernikuuaat qeqqussat aningaasarsiutigineqartariaqartut, qeqqussallu pillugit suliniut tapersersorneqartariaqartut. Qeqqussat tunisassiarineqarsinnanerat pillugu Naalakkersuisut assigiinngitsunik suliaqarput, qeqqussanillu tunisassiornissaq siunertaralugu aallarnisaasunut siunnersuisarfik Nalik Ventures aqqutigalugu siunnersorneqarlutillu aningaasanik tapiiffigineqarsinnaasut erseqqissaatigineqarpoq.