KL

DK

Aningaasanik tigussaasunik akiliisarneq taamaatissasoq

Namminersorlutik inuussutissarsiortut aningaasanik tigussaasunik nioqqutissanut imaluunniit kiffartuussinermut annerpaamik 15.000 koruuninik tigusaqarsinnaanerannik, aningaasatigut peqquserluutinik malunnarunnaarsaanermut inatsit isumaqarpoq

Trophy Hunting Greenland takornariartitsinermik ingerlatseqatigiiffinni tusarniaanermut akissuteqartut ilagaat. Aningaasanik tigussaasunik inerteqquteqalerneq ajornartorsiutaasinnaasoq, taakku isumaqarput, kortit akiliutit tamatigut atorneqarsinnaasannginnerat pissutigalugu, aammalu pinngortitami internetimut attaveqanngitsumi tapiliussatut akiliuteqartitsisaramik
Trine Juncher Jørgensen
JOURNALIST


Aningaasatigut peqquserluutinik malunnarunnaarsaanermut inatsit, Kalaallit Nunaanni juunimi 2023-mi atuutilersinneqarsimasup nutarterneqarnera, Inatsisartut pingasunngormat siullermeerlugu suliaraat. Inatsisit nutarterneqarnerat nunani tamalaani najoqqutassianut naapertuuttumik nunamilu pissutsit eqqarsaatigalugit inatsisit nutarterneqarnerannut qulakkeerutaavoq.

Inatsimmi malittarisassat aningaasatigut peqquserluutinik malunnarunnaarsaanermut akiuinermut nukittorsaataassapput, peqqarniisaarniarnernullu aningaasalersuinermut illersuiniarlutik, ilaatigut nunanit allanit kortinik kinaassutsiminnik isertuussisunik akiliisitsisarnerit inerteqqutiginerisigut. Tamatuma saniatigut qarasaasiatigut aningaasanik kiffartuussisut aamma neqerooruteqartut aningaasatigut peqquserluutinik malunnarunnaarsaanermut inatsimmut ilanngunneqassapput. 

PISARTAGAQARTUNUT

Allaaserisaq una Nutaarsiassaqartitsivimmi aviisit naqitat ilaanni allaaserisaavoq.

Allaaserisat pisartagaqartunit siunissami taamaallaat atuarneqarsinnaajumaassapput.

Atuarluarna.

Inatsisinik unioqqutitsinermut akiligassiisoqartassasoq

Inatsisip aamma aningaasanik tigussaasunik inerteqquteqarnerup, namminersorlutik inuussutissarsiortut aningaasanik tigusassaannik qanoq amerlatigisunik tigusaqarsinnaanerinut killiliisoq, 50.000 koruuninit 15.000 koruuninut appartinneqarpoq. 

Namminersorlutik inuussutissarsiortut aningaasanik tigussaasunik 15.000 koruuninit amerlanerusunik tigusisinnaanerat inerteqqutaalerneranik, tamanna kinguneqarpoq. Assersuutigalugu takornariartitsisartoq 20.000 koruuninik akilimmik neqerooruteqarpat, pineqartup aningaasat tigusassat taamaallaat 15.000 koruunit tigusinnaavai. Sinneri pisisup assersuutigalugu kortimik akiliilluni imaluunniit aningaaserivikkut nuussavai. Pisisoq aningaasanik tigusassaannarnik akiliinissamik kissaateqarpat, inuussutissarsiornermik ingerlatsisup pisineq itigartitsissutigisariaqarpaat, taamatullu pisoqartillugu inuussutissarsiornermik ingerlatsisup tungaanit isumaqatigiissummik eqqortitsinnginnermik naliliisoqartassanngilaq. 

Aningaasanik tigussaasunik inerteqquteqarneq pillugu

Inerteqqut namminersorlutik inuussutissarsiortunut atuuppoq. Inerteqqut inunnut ataasiakkaanut atuutinngilaq. Inerteqqut atugassanik, kiffartuussinermut aamma illunik tunisinermut atuuppoq.

Akiliuteqarneq ataasiarluni imaluunniit arlaleriarluni akiliinikkut attuumassuteqartut imaluunniit attuumassuteqarpasittut pineqarnerat apeqqutaanngilaq. Ataavartumik akiliutit, assersuutigalugu illumik attartornermut akiliutit tunngaviusumik »attuumassuteqanngillat«.

Inatsisinik unioqqutitsinermi annertuumik akiligassiisoqarsinnaavoq. Tassami inatsimmik unioqqutitsisoqarnerani tamatigut tunngaviusumik aningaasat qummut killiliunneqartut sinnerneqartut 25 procentii akilerneqartassasut, minnerpaamilli unioqqutitsinermi ataatsimi 10.000 koruunit akilerneqartassasut, aningaasatigut peqquserluutinik malunnarunnaarsaanermut inatsimmi ilanngunneqarpoq. 

Takornariartitsisartumit isornartorsiuineq 

Siunnersuut januaarip 26-ata tungaanut tusarniutigineqarpoq. Tusarniaanermut akissutit qulit pissarsiarineqarput, kisianni taakku aalajangiiffissatut siunnersuummi allannguinermik kinguneqarsimanngillat, aningaasaqarnermut akileraartarnermullu naalakkersuisoqarfik ilisimatitsivoq. 

Akissutigineqartut ilaat takornarialerisumit Trophy Hunting Greenlandimeersuuvoq, taassumalu erseqqissarpaa aningaasanik tigusisinnaanermut inerteqqutip atulersinneqarnissaa ajornakusoorsinnaasoq, kortit akiliutit ilaat tamatigut atorneqarsinnaanngimmata, nunanilu tamalaani kortit akiliutit ilaat atorlugit akiliisoqaraangat aningaasartuutit amerlanerusinnaammata. Aammattaaq takornariartitsisup pinngortitami internetimut attaveqanngitsumi tapiliussatut neqeroorutinut akiliisitsisarluni allappaa. 

Akiliinermut piumasaqaatit allanngortut

Tamatuma saniatigut aningaasaqarnermut akileraartarnermullu naalakkersuisoq, Erik Jensen, akissuteqarpoq »aningaasanik tigussaasunik inerteqquteqarnerup sukaterneqarnera, suliffeqarfiit ilaasa niuernerminnik allannguinerannik kinguneqassaaq. Tamanna ilaatigut pisisartuminnut akiliinissamut piumasaqaatinik allannguinissamik ilaqarsinnaavoq.« 

Erik Jensenip oqarnera naapertorlugu inatsisit nutaat tunuliaqutaasut eqqarsaatigineqarnerusariaqartut, tassa suliffeqarfiit ilaasa maanna akiliuteqartitsinermut piumasaqaatitik allanngortittariaqaraat. Inatsisissatut siunnersuut apriilip qulinganni siullermeerneqarpoq, pilersaarullu malillugu apriilip 30-anni aappassaaneerneqassaaq.

inuussutissarsiutit samfund
Powered by Labrador CMS