Aalisarnermi pisarisuukkat atorluarneqanngitsut
Eqaluissuit nuliaat tupissutillu qaleralinniarluni aalisarnermi pisarisuukkatut qaqinneqartartut aalisakkerivinnut tunisaanngimmata ukiut tamaasa amerlasoorparujussuit igiinnarneqartarput. Pisuussutinilli tamakkiisumik atorluaanissaq pisariaqartoq, aalisartut aamma kalaaleq igasoq ilisimaneqarluartoq isumaqarput.
Annonse
Kalaallit Nunaata imartaani aalisakkat assigiinngitsut 270-it sinneqarput, taamaattumik sinerissap qanittuani qaleralinniarluni aalisarnermi qalerallit kisimik pisarineqarneq ajorput, aalisakkalli allat, soorlu tupissutit aamma eqalussuit nuliaat pisarisuukkatut aamma qaqinneqartarput.
Taakkuli aalisakkanut suliffissuarnut tunisaanngimmata ukiut tamaasa amerlasoorujussuit igiinnarneqartarput. Aalisakkalli pisarisuukkat assigiinngitsut sapinngisamik amerlanerpaat eqqaannarnagit aalisartunut aningaasarsiutaasinnaasariaqartut, aalisartut isumaqarput.
Tupissutit annerusumillu eqalussuit nuliaat neriniartarfinni kusanasaakkamik qaffasissumillu pitsaassusilimmik sassaalliutigissallugit pitsaalluinnartuusut, taakkulu annerusumik takornarissanit alutorsaatigineqarluartartut, kalaaleq igasoq namminersortoq kalaallit nerisassaataannik nutaaliorluni atorluaasarnermigut nunatsinni nunanilu allani tusaamaaneqarluartoq Inunnguaq Hegelund oqarpoq.
Kisiannili Royal Greenland naapertorlugu eqalussuit nuliaat tupissutillu qaqinneqartartut ima ikitsigaat taakku tunisassiarineqarnissaannut tunngavissaqarani.
Amerliartuinnartut
Ukiuunerani Ilulissat Kangerluani qimussimik qaleralinniarluni aalisarneq ingerlanneqartarpoq, tamaanilu eqalussuit nuliarpassui pisarineqartarput allaallu ima amerlatigilersimapput, tamakku aalisarnermut akornutitut isigineqartalersimallutik. Tunisaanngimmatalu igiinnarneqarneqartut, Ilulissani aalisartoq Karl Elias Guldager oqarpoq.
– Ningittakkanik ataasiarluni amuarnermi ilaatigut 30-it angullugit angisoorujussuit qaqinneqartarput, taakkulu aalisakkerivimmut tunisaasuugaluarpata aalisartunut aningaasatigut tapertaalluarsinnaagaluarput.
– Ilulissat Kangerluani kisimi pinninnani aammali sumiiffinni allani pisarineqartarput, taamaattumik ukiumut tonserpassuit pisarineqartarput taakkulu ajoraluartumik atorluarneqaratik igiinnarneqartarput, tunisaalernissaannillu pilersaaruteqartoqannginnera assut uggornarpoq, taanna oqarpoq.
Ilulissani Royal Greenland aamma Halibut Greenland aalisakkanut suliffissuaateqarput.
Uummannap eqqaani tupissuterpassuusut
Kalaallit Nunaani aalisartoqarfiit annerpaasa ilaani Uummannap eqqaani tupissuterpassuaqarpoq taaakkalu qaleralinniarluni aalisarnermi ukiumut tonserpassuit aamma pisarineqartartut, inuillu nammineq nerisassatik tigoreeraangamikkit tunisaanngimmata amerlanerpaartaat igiinnarneqartartut, Qaaarsuni aalisartut piniartullu peqatigiiffianni siulittaasoq Severin Nielsen oqarpoq.
– Sumiiffiit ilaanni tupissuteqarpallaarnera pissutigalugu qaleralinniarfigineqarneq ajorput. Tupissuteqarfiunerusut nalaaraanni ilaanni qassutinik ningittakkanilluunniit amuarnermi ataatsimi pisat 25 procentiisa missaat tupissutaasinnaasarput, taamaattumik ukiumut tonserpassuit pisarineqarlutillu igiinnarneqartarput.
– Ukiut arlallit matuma siornatigut Uummannami tunisaanikuugaluarput, maannakkullu tunisaasuuppataa aalisartut aningaasaqarnerannut tapertaalluarsinnaagaluarput, taanna oqarpoq.
Uummannap eqqaani qaleralinniarneq annertoorujussuarmik ingerlanneqarpoq, siunissarlu ungasinnerusoq eqqarsaatigaalugu qaleraleqassuseq illersorniarlugu qalerallit kisiisa pinnagit aammali tupissutit aalisarneqarlutillu tunisaalertariaqaraluartut, taanna isumaqarpoq.
Nerisassiassat pitsaalluinnartut
Tupissutit annerusumillu eqalussuit nuliaat nerisassiassatut pitsaalluinnartuusut, taakkulu neriniartarfinni kusanartumik takornarissanut sassaalliutigissallugit piukkunnarluinnaartuusut, kalaaleq igasoq kalaallit nerisassaataannik nutaaliorluni atorluaasarnermigut nunatsinni nunanilu allani tusaamaaneqarluartoq, Inunnguaq Hegelund oqarpoq.
Aalisakkat taakku aalisakkerivinnut tunisaalertuuppata Kalaallit Nunaani neriniartarfiit ajornannginnerusumik pissarsiarisalissagaat, taamaalillunilu tamakku neriniartarfinni taamaallaat pinnani aammali innuttaasut akornanni ilisimaneqarnerulerlutillu atorluarneqarnerulersinnaaaasut, taanna isumaqarpoq.
– Aalisarnermi pisarisuukkatut taaneqartut amerlasuut nerisassiassatut pitsaalluinnartuupput, taamattumik tamakku atorluarneqaratik iginnarneqartarnerat pissusissamisooranilu assut uggornarpoq, Inunnguaq Hegelund oqarpoq.
Taanna namminersortuuvoq suliffeqarfeerarlu Arctic Food By I ingerlataralugu.
Tunisaalernissaat pilersaarutaanngitsoq
Royal Greenlandimi attaveqatigiinnermut siunnersorti Pilunnguaq Egede-Enoksen naapertorlugu Royal Greenland tunisassiassanik imaaneersunik piujuartitsinermik atorluaanermillu tunngavilimmik tunisassiornissamik pisussaaffeqarpoq.
– Aalisarnermi pisarisuukkat uani pineqartunut tunngatillugu tunisassiornissarput massakkorpiaq pilersaarutiginngilarput, matumani pisarisuukkat annertussusaasa killeqarnerat kiisalu tunisassiat qerisut niuerfinni niuerutigineqarsinnaanerisa killeqarnerat peqqutaallutik, taanna oqarpoq.
Taamaakkaluartoq paasissutissat niuerfinnilu ineriartornerit nutaat ilutigalugit Royal Greenlandip ingerlaavartumik periutsinik pilersaarutinillu nalilersueqqittarnerata erseqqissarnissaa pingaaruteqartoq, Pilunnguaq Egede-Enoksen paasissutissiivoq.
